Djasans

Bondjoué Norbert, Bondjoué Nicole, Norbert nôs te tçh’vâtans tot d’ bon po tai féte. Quaitre-vints ç’ ât bïn mains ç’ n’ ât p’ tot. Ç’ n’ ât p’ verai ç’ que l’ temps pésse vite. I m’ en s’vïns encoé tiaind qu’ i étôs tchie toi po aippâre le métie d’ paiyisain è de tchairtie. Ç’ ât dâs li qu’ i aî aippris des grôs mots. Ç’ ât des seuv’nis que d’moérraint. Lai graindge tchie ç’ Louis è ç’te Bernatte. Le tch’mïn Haag dôs Berroie. Ç’te Marquise, ci tchvâ qu’était pus aîjie qu’ ènne fanne è pe qu’ aivait d’ che bés polains. Ci p’tét noi vélo â bout d’ dôs. Ces vaitches, â voiyïn en lai Fïn di Droit. È pe voili qu’ t’ és en l’ hèrbâ d’ tai vétçhaince. Ç’ ât lai moiyou séjon. Lai séjon des moûech’naidges è pe des voiyïns. I t’ en tçh’vâs piein lai Biatte. I vorôs t’ entçh’vâtre ènne boinne saintè è pe encoé bïn des tchâtemps. T’ péss’rés ènne boinne djoénèe daivô tes afaints, tes p’téts l’ afaints è pe bïntôt tes rieres p’téts l’ afaints, sains rébiaie ç’te rotte de beuliotais. È veut y en aivoi des étiafèts daivô tos ces coéy’nous. Vôs èz bïn réjon, è fât rire tiaind qu’ ç’ ât li. I n’ seus p’ aivu en l’ écôle di patois, te m’ padgen’rés po mes èrtieulons, mains djâsaie daivô toi l’ langaidge des p’tétes dgens, è bïn ç’ ât po moi ïn vrâ piaîji. Norbert, pésse ènne boinne vâprèe, bois ïn bon varre de vïn è pe ïn tçhissat d’ gniôle. Ç’ ât daivô ces r’médes-li qu’ an vïnt véye è pe qu’ an d’moére en saintè. Â piaîji d’ te r’voûere dains nôs aissembyèes di patois. Poétche-te bïn. Paulette et Eribert Affolter Dôs les Crêts 4 2610 Sïnt-Mie Revoir Norbert Brahier, deux films : Le soiyou, le faucheur Aipiayie les tchvâs, atteler les chevaux