Publié : 28 juillet 2018

Les trois gourdins, les trois bâtons

Les tras soûetas

Eric Matthey

info document -  PDF - 1.5 Mo

Les tras soûetas

L’hichtoire qu’i vôs veus raicontaie s’ dérôle chu les hâts d’ nôt’ Jura. I m’ muse qu’ vôs coégniâtes tus le Mont-R’pais, c’ te hâtou que s’ trove en lai croujie des vies que v’niant d’Aîdjoûe, di Vâ, di Çhôs di Doubs pe d’lai Montaigne, ci yûe qu’an aippelle mit’naint « Lai Caquerelle ». Ç’ ât aidé aivu ïn hât yûe d’ l’ hichtoire di Jura, dâs dje l’temps des Romains djunqu’ â temps des Bernois d’aivô ci Virgile Moine pe ci Paul Chaudet !

Mains lai fôle qu’i vôs veus dire adjed’heû s’pésse en lai fïn di chéjieme siecle.

È y’ aivait ènne fois tras l’hannes que s’ trovainnent poi hésaîd enson di Mont-R’pais. C’étïnt tras sïnts. È y’ aivait sïnt Ochanne, sïnt Émie, pe sïnt Fromont. I crais qu’éls étïnt tus les tras des dichiples de sïnt Colomban, ci moinne de Luxeuil v’ni d’ Irlande po chrichtianisaie l’ Eurasie di Nord. Ochanne aivait l’chie son caim’râde sïnt Gall d’lai sen di lai d’Constance. Émie, lu, c’était ïn vrâ l’ Aidjôlat que v’niait d’ Niungnez laivoué qu’ él était tchoi â monde. Tiaint qu’è Fromont, an n’sé p’ trop d’ laivoué qu’è v’niait ne c’ment qu’ é s’ ât trovè li !

Dâli, aiprès aivoi péssè lai neût dains lai prayiere, lai djâb’rie, lai dichcussion, è pe bïn chur aiprès aivoi âchi ïn pô dremi, voili nôs tras rudes coyats qu’déchidans d’paitchi tchétiun d’ènne sen po porcheûdre lai mission qu’ yos aivait confiè ci Colomban. Mains voili ! C’ment faire po saivoi tiu d’vait allaie laivou ? Aiprès aivoi bïn musè, ç’ât ci sïnt Fromont qu’ât aivu lai moiyou aivisale : tchétiun tchaimprait son soûeta bïn hât dains l’ cie pe s’ âdrait ïnchtallaie laivoué qu’è srait r’tchoi. Feut dit, feut fait !

L’soûeta d’ sïnt Ochanne s’allé fichquaie aiva l’ Mont-R’pais chu ènne roitche d’vâs d’chus l’ Doubs. Not’ sïnt feut dïnche è l’ouridgine d’ lai bèlle vèlle qu’nôs coégnéchans adjed’heûs.
L’soûeta d’ sïnt Emie, lu, allé ïn pô pu laivi, djunqu’ dains l’ Jura-Sud, dains l’vâ d’lai Suze. Li, not Aidjôlat s’boté è éssapaie pe è laiboéraie ci fond vâ qu’ ât dev’ni, mains bïn pu taîd, ïn des pus gros v’laidges de r’leudgères di Jura. È pe ci bon sïnt Fromont, qu’ ât-é dev’ni ? È bïn, son soûeta, è s’ât tot sïmpiement aivu piaintaie dains l’paiyis des tchênaies è des étaings, tchie les Bâts, è Bonfô. Li, not’ hanne n’è p’ fondè d’ môtie è ç’ nât meinme pe lu qu’è fait è v’ni les poties. Sïnt Fromont, c’était ïn sïnt paiyisain. È b’nâchait les tchaimps pe les récoltes, è pe è botait les bétes en l’aissôte des malaidies pe des l’aiccreus. C’était l’aimi des tchvâs, des bûes, des roudges-bétes, de totes les bétes d’ lai fèrme è des bôs. Dâli, ç’ ât po çoli qu’ encoé d’ not’ temps tchétche vardi d’ l‘ Aiscension, les paiyisains d’Aidjoue pe di Sundgau, mains âchi d’ âtres dgens, vaint aidé en vyaidge en lai Sïnt Fromont è Bonfô.

Moi, i vôs l’ veus bïn dire : sïnt Fromont, ç’ ât çtu qu’i ainme le meu ! È pe, ç’ât craibïn po çoli qu’ en c’ t’ annaie 2007, lai Sïnt Fromont tchoit chu… lai Sïnt Éric !!!

Les Foulets, le 20 d’aivri 2007 Eric Matthey
Les tras soûetas
(défâtè poi J-M. Moine, en lai d’mainde de ç’t’ Eric)