Vous êtes ici : Accueil > Contes, nouvelles, chansons, presse, radio, films, pages d’histoire > Blagues, loûenes > C’ment nâché l’ « schwytzertütsch » !
Publié : 27 juin 2018

Comment naquit le schwytzertütsch

C’ment nâché l’ « schwytzertütsch » !

Eric Matthey

C’ment nâché l’ « schwytzertütsch » !

Tchétçhyun sait qu’ not’ patois vïnt, po écmencie di celte pe di laitïn. Mains tchétçhyun sait âchi qu’lai pupaît des landyes tirant loûes ouridgines d’l’ai famouse toué d’Babel, qu’an djâse dains lai Bibye.

Dâli, voili que c’te toué en était dj’ en son permie étaidge tiaind qu’ïn maiçnous, qu’aivait fâte de britçhes, breuyé en ïn manoeuvrie qu’ beurlandait aivâ d’lai muraîye :

—  Hé, monte-me des britçhes !

È djâsait frainçais… mains l’manoeuvrie n’aivait p’ tiute.

—  « Presto, pigro » ! breuyé l’maiçnou. (dépâdge-te limpet !)

L’manoeuvrie, que n’compregniait aidé pe èt qu’ écmençait è mâçhiaie les mots, rempiât ïn soiyat d’ molte en lai piaice des britçhes qu’ l’âtre yi dmaindait, pe l’ monté d’aivô l’ monte-tchairdge. Tiaind qu’ le maiçnou, en aimon, voiyé l’airtieulon, él entré dains ènne grosse roingne :

—  « You, pig » breuyé-t’é ! (bogre de poue !)

Mains l’ manoeuvrie l’ ravoétait bét’ment dâs aivâ, en y’vaint lai téte, d’aivô lai boûetche grante eûvie. Dâli not’ maiçnou pregné ènne pâlatte de molte pe lai tchaimpé djeûte dains lai goûerdge di malhéy’rous. Ç’tu-ci f’sé ïn peut tchoûeré en s’ toûejaint d’totes les sens. Enfïn, aiprés de tèrribyes éffoûes, quéques d’mâçhe-noi-gregion bruts paitchainnent feû d’sai goûerdge en broiyiaint les lattres, en étôffaint les sïns :

—  « Du sauchaibe Welsch ! » (tchèrvôte de poue d’Welsch !)

An ritont en son s’couè, an lu décombront lai goûerdge c’ment qu’on l’poyé, mains an n’poyé ran tchaindgie ès dus pe d’mâçhe-noi-gregion sïns qu’s’en étchaippïnt.

Le « schwytzertütsch » était ïnventè !

Les Foulets, le 20 de djuïn 2009-06-17 Eric Matthey