Djasans

Sur RFJ, 11 novembre 2023

Lai Sïnt-Maitchïn

Lai Sïnt-Maitchïn s’féte lo doujieme dûemoinne di mois d’nôvembre. C’ât ènne féte peupyâ (populaire) qu’ât devni ènne traidichion vétiainne. En lai Sïnt-Maitchïn, l’traivaiye des tchaimps était fini èt an aivait paiyie les baiyes. Cment qu’les paiyisains n’étïnt pe bïn rétches en ces temps-li, èls engréchïnt ïn poûe po lai Sïnt-Maitchïn. En prïnchipe an l’tiuait lai snainne aivaint èt an maindgeait dje les aibaits, les paitchies que se n’voidjïnt pe. Èt èl ât bon de raipplaie que dains l’poûe, tot ât bon ! Ènne boinne paitchie d’lai béte, les bés moéchés, étïnt - yos - dépôjès dains lai mè aivô lai salaijon. Aiprés an daivait pendre lai tchie â satchou qu’se trovait â dieugnie di tchété de Tieûve. Mon Dûe qu’è yi aivait des bés moéchés ! Èt peus c’que lai tchairpente di tchété était bèlle ! Dâli, ç’ât bïn bé de voidjaie les traidichions, mains tiu ât-ce que muse en ci péssè que n’ât pe chi loin ? Ât-ce qu’è yi é brâment d’ces qu’faint ènne maîrtche de lai Sïnt-Maitchïn qu’yi musant ? I en dote, tiaind qu’an voit tot c’qu’ât mâviè (gaspillé), tchaimpè (jeté) : des aissietes è poinne ècmencies qu’sont vudies aivô les détchèts !! Laivoù ât l’messaidge que nos é léchie ci sïnt Maitchïn en paitaidjaint son mainté en dous po véti ïn poûer hanne que grulait d’fraid ? Voidjaie les eûsaidges (coutumes) ç’ât bïn, voidjaie les raicènnes de ces eûsaidges, ç’ât meû… Boinne Sïnt-Maitchïn en tus… È vive lai Sïnt-Maitchïn… L’Ugéne, 12.11.23