Vous êtes ici : Accueil > Contes, nouvelles, chansons, presse, radio, films, pages d’histoire > Messes des patoisants et prières > Sermon de la messe de la fête cantonale du 2 septembre 2012
Par : Fleury LJ
Publié : 25 octobre 2012

Sermon de la messe de la fête cantonale du 2 septembre 2012

Abbé Jacques Oeuvray

{12e Féte caintonale di patois – Le Nairmont – 2. 09. 2012} Ecouter tout le sermon
Mes boènes dgens, aimis di patois di Jura é de poitchôt. Nôs veniant d’ouyïe lés yéjures de ci dûemoène de féte. Djésus nos ïnvite adjd’heû è musaie tchu not mainïre de vivre not crèyïnce, nos mainïres d’aidgi tot lés djoès. Ç’ât di fond d’nos tiûres que vïnt tot ç’qu’en fait : en bïn, ou en mâ. Lés dgens ne raivoétant qu’ le d’feu, lés aipaireinces, main le Bon Dûe raivoéte le tiûre. Le p’té Prïnce de Saint Exupéry le diait d’je : « En ne voit bïn qu’aivo le tiûre ». Lés dgens diant, lés dgens diant, main dain l’fond è n’saint ran. In po c’ment l’tiurie que diait en ci Djoset que fréquantaie lai Mady dâ at moins dieche ans : « Djoset, è vos s’fât mairiè mïntnain ! Lés dgens djâsant ». « Oh, qu’yï dié l’Djoset, chire tiûrie, s’vos nôs voyïnt dés cos, vôs crèrïnt qu’nôs y sont » ! En oûyant lai pairole de Dûe, nos poéyant conchtrure ènne étchile de valous que nos éde è voûre ç’qu’ât l’moiyou po nôs é po çés qu’nos ainmant. Tot n’é-pe lai mainme valou dain lai vie. Musait-te ïn po ç’que diè Djésus dés eûffrainces aippoétchaient en l’âtée : « çe t’aippoétche ton eûffraince en l’âtée é que li, te te s’vïnt que ton frére é âtçhe contre toi, léche li ton eûffraince. Vais dvaint te réconcilïe aivô lu è peu r’vïns présentaie ton eûffraince. » (Mt5,23) En bottaint tot tchu l’mainme plan, nos risquant d’faire ènne fâsse étchïle de valous. Vos l’sètes bïn : dvaint l’concile de Vatican dou, ç’étôt ènne grave fâte de boire ïn po d’âve aiprès minûe dvaint d’allaie comnyuait en lai mâsse. Ç’étot ènne grave fâte de maindgie d’lai tchïe l’vardi ! È y é tot d’mainme dés tchoses pu importantes que çoli. Faire de cés pratiçches dés péchés mortels, renvoache tot not étchïle de valous. Dâli, en peu dire de cés dgens-li, cment diè lâtre : « Vos è bïn di dgeait, main ç’n’ât-pe di bé ! » D’je le prophéte Isaïe, que r’prend Djésus diait : « çi peupye me praye dés maîrmes, main son tiûre ât bïn loin d’moi ! » ç’ât di dedain que veniant lés croûyes pensaies é ç’ât âchi di dedain que nos trôvant lai foûeche de vivre c’ment Djésus-Chricht. Ç’n’ât p’ aigie tot lés djouès, bïn chur. Main è nos fât mairtchi dain ç’te san-li. Voûere lés âtres aivos dés novés eûyes. Pe c’ment ci Diu aivô sai belle-mére. Le Totor y dié : « Qu’ât-ce qu’è y é de neû ? Oh ! ran qu’y dié le Diu . Ah chié. Mai belle-mère ât moûe lai smaine péssaie. Ah ! é qu’ât-ce qu’èl aivaie, qui dié Totor. Oh ! qu’y dié l’Diu, pe grand’tchose : doûe selles, ènne tâle, ènne armére ! » Adjd’heû, Djésus nos dit d’oû vïnt le bïn é le mâ : da not tiûre. É è veu tchaindgie not tiûre de pïere en ïn tiure de tchie, ïn tiûre que bèt po lés âtres, po le bïn de tus. È nos ïnvite aidé è revoûere not étchile de valous po botaie aidé en premïe ce qu’ât le moiyou. Djésus nos dit qu’è n’fât’p’ crère tos cés qu’veniant dire n’impoûetche quoi de lai paie de Dûe. È n’lés fât p’ crère. C’ment dain ç’t’ichtoère que s’pésse è Bellelay. Lés dgens s’promenïnt dain l’tcheûtchi. Da ènne fenétre è gâtche de lai mâjon, ïn hanne se botaie è breûyie : « écoutaites-me ! I seu l’envie de Dûe ! » Dâli, de l’âtre san d’lai mâjon, ïn âtre hanne y répond en breuyaint : « Ne l’écoutètaites peu. I n’aie niûn envie ! » È s’fât aidé méfiaie de cés qu’veniant pailaie de lai paie de Dûe ! ç’ât aidé yôs idées qu’è faint péssaie é pe lés pairoles di Bon Dûe. È n’y en é qu’ûn que nos poyant crère : ç’ât Djésus-Chricht. Lu, ne nos trompe djemais. Èl ât le tchemin. lai voiretaie, lai vie. Oh ! dés côs, en pe âchi écoutaie l’medecïn. Ç’qu’è nos dit, bïn dés côs ç’ât po not bïn. Le Tiodore é t’aivu sés soixante-cïntçhe ans main è n’aivait pe toutchi son AVS. Sai fanne y dit : È te fât allaie voûre le médecin po qu’è t’feseuche ïn certificat po dire que t’é bïn soixante-cïntçhe ans. Tiain qu’è r’vint, èlle y d’mainde : « dali qu’ât-ce qu’è t’é dit ? Oh ! è m’é d’maindaie rotaie mai tchmije. Tiain qu’é l’é vu tot mon gris poi è m’é dit : è n’en fât-pe dotait, vos é bïn soixante-cïntçhe ans. I vos veu faire ïn certificat ». È peu sai fanne de y dire : « è n’t’é p’ fait béchi tai tiulatte ? T’airo âchi toutchie l’ïnvaliditaie ! » Lés dgens bïn, di temps Djésus, lés pharisiens, s’en preniant è Djésus poéche qu’è yos r’preutche de ne raivoétie que le d’feû. Djésus, lu, yos dit de raivoétie le tiûre. Mainme lés véyes traditions ne poéyant-pe rempiaicie le tiûre. Lés sacrements que nos é bèyie Djésus sont li po nos dire que Dûe veut aidé le moiyou pou nos. È peu è sont aidé li pos nos. Mainme si lai ptéte Julie é réponju â chire tiurie â catétçisse que y d’maindaie cobïn è y aivaie de sacrements : « è n’y en é pu, M’sieur l’tiurie. En on bèyïe lés dries en mai grand-mére lai semainne péssaie ! » Le fa-bigot, ç’ât ç’tu pairât ç’qu’è n’ât pe. È coatche çe qu’èl ât en voiretaie. Ç’ât dïnche qu’en tchaindge lai r’lidgion en ènne prijon que nos enyeûve lai libretaie dés afaints de Dûe. In po cment ç’te poûere Djustine qu’é vlu entraie dain ènne secte. In djoué, le pasteur y dié : « Djustine è vos s’ fât batayïe dain lai vraie relidgion. Dûemoène que vïnt nos vlan allaie dain l’Doubs è Sïnt Ochonne po çoli ». Dali, lai Djustine, véti d’ènne biantche robe, déchant dain l’Doubs aivô l’pasteur. È y bote ïn premïe cô lai téte dain l’âve é lai r’yeûve en diant : dali, mai soeûr, vos è vu not Segneu ? Nian qu’y dié lai Djustine. È y r’bote lai téte dô l’âve pu grand. Tian qu’èl revint en l’oûere en çiouçiaint, è y d’mainde : Dali , mai soeûr vos è vu not Segneu ? Nian ! È y rebote ïn trajïeme cô lai téte dô l’âve pu grand encoè. Tian qu’èl revïnt, tote bieûve, le Pasteur y dié : Dali, vos è vu not Segneû ? É lai Djustine de y dire : « Vos étes chûre que ç’ât li qu’è s’ât nayïe ? » En pailaint dïnche, cment nos veniant de l’ouyïe, Djésus nos dit âtçhe d’impoétchaint : lai fâte n’ât-pe dain ç’qu’en fait, main dain l’hanne ou bïn lai fanne que le fait. Le mâ se tïnt dain le tiûere. Tot le mâ vïnt da le d’dain. É ç’ât çoli que détrut l’hanne. Adjd’heû, qu’nos sont en féte, demaindant ât Bon Dûe, de nos voidgeait aidé dain çt’echprit po vivre libre dain le monde é en afaints de Dûe bïneyerous d’étre ât monde é di voûere çhiaie ! Que se feûche dïnche !