Djasans

L’Ugène, RFJ, 14 mai 2023 Radio Fréquence Jura RFJ rubrique en patois, Thème : Fête des mères

Lai féte des méres (14 mai 2023)

L’corann’ment d’ïn roi, an s’en fot, poéche que tiaind qu’an voit lai misére qu’è y’é dains l’monde èt peus voûer çoli, ç’ât ènne grôsse honte ! Poétchaint les feuyes, les boétes è imaidges èt les boétes que djâsant nos aint snieûlè in sakeurdie d’temps. Dâli moi i vos veus djâsaie d’âtre tchôse de bïn pus bé, de bïn pus grant : lai féte des méres. Po çoli, i aî tradu 2, 3 ptéts poémes d’afaints…

1. Sïmpyement

I aî tçhri dains les poémes Cment dire i t’ainme. I aî trovè des mots saivaints, Bïn trop grants po moi. Dâli i aî tieuri âtre paît Èt i aî trovè dains mon tiûere Les mots que t’m’és aippris Tiaind qu’i étôs encoé ptét. Manman, i t’ainme dïnche ! Èt i l’dis âchi aivô mes brais.

2. Po mai manman

I aî tieuyè trâs çhoés dains les tchaimps Mains lai pus djôlie qu’i ainme taint Mains lai pus djôlie, ç’ât po mai manman. I aî trovè trâs biancs caiyôs Mains lo pus djôli qu’i ainme taint Mains lo pus djôli, ç’ât po mai manman. I aî âchi trâs bés ribans Mains lo pus djôli qu’i ainme taint Mains lo pus djôli, ç’ât po mai manman. I n’aî qu’ïn ptét tiûere d’afaint Mains mon ptét tiûere que l’ainme taint Mon ptét tiûere, ç’ât po mai manman.

3. Tot s’peut yusaie

Dains lai vie, tot s’peut yusaie Mes tchâsses, mes soulès, Mon graiyon èt mai gomme è éffaicie. Mains moi i coégnâs ènne tchôse Que ne peut djmais s’yusaie. Ç’ât lai djoûe d’ènne manman Que rci des baîjats d’son afaint.

4. Manman

È n’y’é pe bïn grant, i n’étôs pe grant Èt i t’ainmôs dje manman. Mains adjd’heû i seus vni grant Èt i t’ainme encoé aitaint manman. Èt dmain tiaind qu’i sré ïn hanne I t’ainmeraî encoé aidé manman.

5. Lai féte des méres

Ç’ât adjd’heû lai féte des manmans. I y’ veus eûffie ïn tchairmaint boquat Mains qu’ât-ce qu’èlle ainme lo meu ? Les rôjes ? Les yiyas ? Les eûyats ? Moi i saîs : pe les çhoés les pus tchieres Mains ïn boquat d’çhoés des tchaimps Aivô ïn baîjat d’son afaint. Les ptétes tchôses de lai vie, ç’ât bïn pus qu’lai foûetchune. Les pairôles d’ïn afaint, les baîjats d’ïn afaint, çoli vât pus qu’les sous… Dâli, en vos les manmans, i vos tiuâs tot l’bonhèye di monde èt i vos embraisse bïn foûe. L’Ugéne, 14.5.23