Djasans

S’qu’nos vlan pus voûere C’ment an cimentait les étâles en 1945

Le piaintchie d’note étâle était tot en bôs, fait de piaitons de 3 cm d’épassou, d’vés-d’dôs d’cés d’l’épâlou, des ptchus qu’ètïnt maînè po r’teni lai mieûle, què fayait vudie â peûjou dains ènne grosse soiye, qu’nos poétchïnt po lai voichaie dains le beureut piaicie de côte d’lai poûetche d’étâle. In cop qu’èl était piein, qu’nos aivïnt aippiaiyie note « bichette », nos allïns le vudie dains lés tchaimps, è nos fayait tote ènne vâprèe, se boudgi po étre prât d’vaint d’aifforaie. C’était ènne s’’nieûle què fayait r’ècmencie prou s’vent, qu’lai mieûle ne soyeuveuche pe les piaitons. Coli f’sais dje ènne boussiatte qu’mon pére s’musaie : Che pé c’t’étâle était cimentaie. C’ment brament de dgens d’note câre, nos n’aivïns’p brament de sous. È se d’maindé c’ment è porait faire, sains tra déboéchie, aidonc è s’diét : po aivoi di sâbye et di graîvie, è me fat des pieres, ïn gros moncé, et ènne concaissouse, dïnche i veut dje aivoi ènne paitchie de ço què fat. Aiprés aivoi prou maîyennaie, è décidé d’entrepâre cte grande besoingne, po coli è se boté è raiméssaie des pieres, qu’èl allait botaie en moncé dains lai carriere, d’vés-tchus de tchie-nos. Mon pére aivait ènne piece de tiere d’aivo bïn des reûtchèts qu’étïnt è rais de tiere, embétains po y faire lai tchairrûe. Aidonc, è se musé i veus faire sâtaie cés reûtchèts, è les é ïn pô dégaidgie, po révisaie voué è fayait poichie le ptchu, po qu’ès sâteuchïnt d’aidroit di premie cop, qué temps qué fayait po poichie ïn ptchu d’ïn-d’mé métre tot en viraint lai bairraimine. Tirie feûs le sâbye di ptchu, d’aivo ènne petéte curatte, qu’an f’sais d’aivo ïn gros flé de couvre aipiaiti en ïn bout é ploiyie po faire tçhlie. C’ment mon pére aivait ïn pô tieûsain de tchairdgie lai mine, é f’sé v’ni ïn coégnéchou, le vèye carrie de Saigneleudgie, François Conti dit : « Mourette » que yé aippris c’ment faire : Tiyssie dains ci ptchu ïn échepèce de tyau en couvre, r’loiyie â bout d’lai moétche (le détonateur) l’envirtolaie d’lai boinne meujure de ço què fayait po faire è sâtaie cés reûtchèts, (d’lai cheddite) soûetche de paîte. An bourrait sains biassie lai moétche, retieuvri les reutchèts de raims d’saipïns entrecroujies po envoidgeaie les pieres de sâtaie tra loin. Enfûere lai moétche, se chiquaie di daindgie…Poum ! le gros di traivaiye était dje fait . Encoué quéques cops de pieutchèts po révaie ço que d’moérait qu’était dje bïn démisloquaie. C’ât d’aivo le tché è effremoûeres, bïn chur encoué des rues è scoiçhes, qu’nos aimoinnïnt totes cés pieres en lai carriere, po les botaie â moncé qu’mon pére aivait dje ècmencie, tos les cops qu’èl aivait èparoiyie ses tchaimps aiprés lai tchairrue. Tiaind le moncé de piere feut prou grôs mon pére è creuyie â londg de l’hôtâ voué était l’aissiette di femie, po y faire ïn creux de mieûle, tot è brais, pâre lai boinne tiere po lai condure voué è y en mainquaie tchus les finaidges, tot en botaint de côte les pieres, aitot qu’lai groîse qu’è trovait en creûyaint. En lai fïn di mois de mai, tiaind qu’an ât tiytte de rentraie les bétes en l’étâle, èl allé tchri vés ci chire Geiser de Lai Farrèe lai concaissouse, ènne che poijainne brequainne, que po lai faire aivaincie les dous tchvas daivïnt bèyie ïn bon cop de boré chutot po l’ébranlaie. Po concaissie nos étïns trâs, ïn po rontre les pus gros caiyos aivo lai masse d’vaint d’les tchaimpaie tchu lai tâle, ïn tchu lai machine po enguenaie les pieres dains ïn échepèce d’embossou d’aivo tot â fond des maitchés qu’les écâchïnt, les gros caiyos aivïnt di mâ de péssaie, c’ât d’aivo le bout di maintche de lai pâle, qu’était farraie què fayait fri, sains se faire pâre dains les maitchés, et yun po rempir les boyevattes ènne de graîvie et ènne de sâbye, po en faire dous moncés bïn sépairè. Mains qué pidie po botaie en mairtche ci gros moteur è luciline, virie cte grosse coérbatte quasi ïn quaît d’houre, d’vaint què n’paitieuche, peus tot d’ïn cop dous-trâs teuf-teuf et le voili en branle. Nos poyïns ècmencie cte besoingne che du, d’aivo ci brut d’enfé, et encoué s’envoidgeaie de n’pe r’cidre des ptétes pieres, chutot dains les eûyes. È nos é fayut ènne s’nainne po aivoi â di toué de trente métres cube de graîvie, et è pô prés ché de sâbye. Po servi lai machine, Geiser d’maindait trente sous di métre cube È n’nos d’moérais pus què allaie tchri le ciment que cotait painé quairainte sous le sait. En l’étâle tot révaie cés piaitons, peus empieraie po faire bïn piaîn. È nos fayait allaie r’tcheri les pieres et le sabye en lai carriere. D’vaint que dous maiçons de l’entreprije « Molinari » n’venieuchïnt nos édie, po coffraie le creux, y faire lai morlatte po poyait y botaie pus taîd des véyes traivoiches de tch’mïn d’fie. Les dous mon pére nos f’sïns le motchie ( le r’muaie et le mâciè bïn chur en lai pâle, po le moéyie nos pregnïnt ïn airrôsou) d’vaint d’le condure d’aivo lai boyevatte és maiçons qu’le botïnt voué è fayait et qu’le damïnt po què n’y euche pus de p’tchus d’air, què feuche bïn sôlide. Tiaind nos aint t’aivu tot fini de cimentaie, è nos d’moéraie encoué quéques métres cube de concaissie, qu’nos aint poyut vendre, dïnche coli nos é paiyie ènne paitchie de ço qu’coli nos aivais côtaie. Coli était dje bïn pus aîgie po nentaiyie l’étâle, et nos étïns tçhiyte de pûjie et poétchait les soiyes de mieûle. Mitnaint po cimentaie, c’ât ïn hanne que vïnt d’aivo ïn « camion è béton » et c’ât d’aivo ïn gros tuyau qu’ïn ôvrie l’condut voué èl l’fât. Raiméssaie di cija. Po foénaie, nos ècmencïns pai soiyie l’voirdgie, en lai fâ, è case des aibres, nos raiméssïns les bovâts po les fotre laivi. Poche que c’était di tot croûye forraidge po lai saintè des bétes. C’ment è y aivait brament de cija, ïn cop l’heirbe soiyie nos l’raiméssïnt po en faire des p’téts faigats qu’nos botïns dains des p’téts biaincs saits, po què feunécheuse de maivurie et de soitchi, pendus en lai sôte, mains bïn â soroiye, nos en aivïnt aidé prou, po tiaind qu’nos f’sïnt les andoéyes, les tchos salès, lai compôte és raîves. Aitot po tiaind qu’è fayait faire ïn brûe po l’aivalaie en ènne roudge béte qu’était cote â raindge. L’heirbe copèe en lai soiyouse ét traivaiyie en lai foûertche et â rété ne v’nait’p tchaipièe c’ment mit’naint, adjedheus c’at le moiyou que d’moére tchus le câre « le çheûjïn » qu’an servéchait po le loitchat des bétes. Ènne boinne loitch’rie po les roudges bétes Ïn cop les bétes en roitches, tos les saimdé, è fayait faire le çheujïn, bïn nenttaiyie le fond d’lai graindge chutot d’vaint les boérainçes, tot le raissembiaie en ïn moncé, d’vaint d’le péssaie â gros créle posè tchus ïn trâté, què fayait bïn s’coûre po y révaie les beûtches. Aiprés botaie en piaice le vannou po démâciè le bon çheûjïn, (cious de foin ou grainnes de foin )d’lai tiere, des p’téts cayos et di poussat. Peus an le botait dains de grosses saitches po le r’pâre po le loitchat des bétes. Le Loitchat An le poétchait dains ènne mé, an y voichait ènne grose tiaisse de graînnes de yïn tieute et encoué bïn tchâde pai-tchus.Peus di creuchon, d’lai noire fairainne, d’lai sa, qu’an ècmencait de mâciaie d’aivo ènne trein sains maintche, po n’ pe se breûlaie. An finéchait aivo les mains, po le botaie dains les copats d’vaint les poétchaie dains lai roitche di temps qu’les bétes s’aibreuvïnt tchus le nô d’vaintl’heus. Djainvrie 2005 Le Vâlat