Publié : 19 août 2018

Une histoire de tablier de ménagère, de maman

Ènne fôle di d’vaintrie

graiy’nè poi A.-M. Kasteler, djûe poi Marion Matthey

Ènne fôle di d’vaintrie (19 de feuvrie 2010, tchie les Tchievres) (graiy’nè poi A.-M. Kasteler, djûe poi Marion Matthey) -ç’ que te t’ svïns di d’vaintrie d’ tai grand-mére ? L’ prïnchipâ l’ eûsaidge di d’vaintrie d’ grand-mére, ç’ ât po vadgeaie lai reube en d’dôs ; è peut âchi sèrvi d’ metaine po r’tirie lai tchâde tçhaisse di foéna è di foué. Èl était bïn bon po réchure les yairmes des afaints, è pe quéques côps, po nenttayie les oûedges vésaidges. Po l’ dgeurnie, le d’vaintrie sèrvait âchi po trainchpoétchaie les ûes è les malaites pussïns, des côps les éffreulaindrès l’ ûes qu’ péssïnt dains f’ foéna. Tiaind qu’ les envèllies airrivïnt, le d’vaintrie était l’ aissôte po les afaints qu’ aivïnt pavou. Tiaind qu’ lo temps était frâ, lai grand-mére s’emmitoufyait les brais d’aivô. Ci bon véye d’vaintrie f’sait ôffiche de çhiôçhat en saitchaint â d’tchus di fûe d’ bôs. Ç’ ât lu qu’ trïmbalait les pomattes è pe l’ bôs-sat djuqu’ dains lai tieûjainne. Dains l’ tieutchi, è sèrvait de p’nie po brâment d’ tchôses, po les yédyumes : aiprés les p’téts pois v’gnïnt les tchôs, les pomattes, les gairattes… En hèrbâ, an s’en siejait po raiméssaie les beûtches è pames tchoi dôs l’ aîbre. Tiaind qu’ des dgens airrivïnt poi churprije, l’ véye d’vaintrie d’ lai grand-mére dev’gnait ènne goiye è poussat. En l’ houre de nonnaie, lai grand-mére allait d’vaint lai poûetche chus les égrèes ; èlle saitchait son d’vaintrie è les hannes qu’ étïnt â tchaimp aleintoué d’ l’ hôtâ saivïnt qu’ ès d’vïnt péssaie è tâle. Lai fanne s’ en siejait âchi po botaie l’ toétché è r’fraidi chus lai f’nétre. Mit’naint, sai baîchatte le bote dains l’foué qu’ tieût vit’ment poch’que ç’ ât s’vent di toétché qu’ ât v’ni d’ lai boéte â frâ. Ç’ n’ ât p’ encoé d’main qu’ quéqu’un veut ïndg’niaie ènne dïnche aiffaire po rempiaicie ci bon véye d’vaintrie qu’ an fait taint d’ tchôses.