Publié : 25 juin 2018

La farine

Lai fairainne.

Jean-Marie Moine

Lai fairainne.

Cïntçhe djûenes dgens di v’laidge étïnt paitchis, è y é craibïn ché annèes po édie è baîti ïn grôs môtie dains ïn véjïn vâ. C’ât qu’ nôs dgens craiyïnt, mitnaint, en ran qu’ïn Dûe qu’ s’était fait è coégnâtre poi son fé, l’ Chricht. Els étïnt dev’nis des chrétiens. Els s’étïnt r’trovès d’aivô brâment d’âtres dgens que v’niïnt d’ïn pô tot l’ traivie di paiyis po faire ènne grôsse mâjon di Bon Dûe, ïn môtie. E y en aivait qu’ saivïnt dj’ traivaiyie lai piere, le bôs, le varre, le fie. D’âtres c’ment yos, n’ saivïnt ran faire d’âtçhe qu’ yote métie d’ paiyisains, mains ès prâtïnt yôs brais, yote v’lantè po s’édie. Adjed’heû qu’ le môtie était dj’ bïn en train, qu’an poéyait dj’ ïn pô voûere ç’ que çoli v’lait bèyie, ès r’veniïnt â v’laidge po dire bondjoué en yôs dgens, po aivoi quéques novèlles, pe po pâre ïn pô d’ répét. Dains yote mairtche di r’toué, ès n’aivïnt p’ trovè l’ temps grant. Es s’ raicontïnt yôs seuv’nis, les premies temps, tiaind qu’ès n’aivïnt ran fait qu’ de creûyie lai tiere, d’ tirie des pieres, obïn d’ copaie di bôs. Pe, èls aivint daivu poétchaie vou boy’vattaie tot çoli â bon yûe, qu’le soi, yôs mains étïnt pieinnes de saing, yôs dôs tâlès poi lai sô. Djemaîs ès n’ s’étïnt p’ piains, c’était po Dûe qu’ èls aivïnt traivaiyie, qu’èls aivïnt seûffri. Pe, voûere ces djûenes di Jura qu’ ès n’ coégnéchïnt p’ tus, qu’aivïnt lai meinme craiyaince qu’ yôs, çoli les aivait encoéraidgies po aidé émondure. Chutôt, d’ côte des crovèes de tchétçhe djoué, èls étïnt dev’nis coégnéchous des méties di bôs, di fie, d’ lai taiye d’ lai piere, pe d’ lai maiceinn’rie. L’yun d’yos saivait meinme yére pe faire ïn pian, ç’ât po çoli qu’ès l’aipp’lïnt mitnaint l’ Graiyon. C’ n’ât p’ le tot, qu’ès s’ diainnent en airrivaint bïntôt â v’laidge. Nôs n’ains p’ aippris ïn valmon de tchôses po ran, nôs dains trovaie âtçhe de neû po nôs dgens, po les édie dains yôs bésaingnes. En péssaint d’vaint tchie lai Tçhaitrine, ès lai voyainnent écabreleûchie chus ïn roétchèt. Es s’aippretchainnent po yi dire bondjoué, mains n’en finéchïnt p’ de s’aippâre des novèlles. E paît les moûes pe les néchainces, è n’ s’était quasi ran péssè d’ nové â v’laidge. Lai Tçhaitrine péssait l’ pus grant d’ son temps è meûdre di biè. Dâs grant, nôs dgens maindgïnt dj’ di pain. Po faire d’ lai fairainne, èls aivïnt ècmencie poi maitch’laie les grains d’ biè d’aivô ïn pâta dains des échpèces d’étçhéyes en bôs. Els aivïnt âchi épreuvaie d’ meûdre en péssaint ïn pâjaint rôlat en bôs chus ènne coutche de biè. Prou tôt èle aivïnt airrâtè poch’ que l’ biè s’ botait en moinnèe d’vaint l’ rôlat qu’ yi péssait poi d’ tchus sains l’ meûdre, sains comptaie tot l’ biè qu’ se predgeait en s’sivaint de tchétçhe sen di rôlat. Lai Tçhaitrine, lée, aivait trovè tot prés d’ son bacu ènne roétche bïn piaintèe dains lai tiere, qu’était creûyie en d’tchus d’ènne prou grôsse tiuvatte. Elle lai rempiâchait d’ biè pe en rôlaint ènne ronde piere poi d’tchus, èlle écraisait les grains qu’ bèyïnt ènne bèlle grije fairainne. C’était du, lai poûere fanne était tote môve de tchâd. E bïn, qu’ dié l’ Graiyon en lai Tçhaitrine, i crais bïn qu’ nôs v’lans poéyait faire âtçhe po vôs, qu’ vôs n’aiveuchïnt pus taind d’ mâ. Dûe sait b’ni, qu’yi réponjé lai fanne. Pe tchétçhun r’venié en l’hôtâ. Les cïntçhe djûenes dgens se r’trovainnent bïn s’vent. L’ Graiyon n’ râtait p’ de faire des pians pe d’échpyiquaie és âtres ç’ qu’è s’ musait. Pe, tiaind qu’tot feut bïn çhai dains yôs tétes, ès s’ botainnent â traivaiye. Les taiyous regu’nainnent po trovaie des boinnes pieres, le mairtchâ foûerdgeait les bons utis, le m’nujie tchoijéchait l’ bon bôs. Els aimoinnainnent tot çoli chus piaice, ïn pô c’ment po l’ tchaintie di môtie mains bïn chur en pus p’tét. Tiaind qu’ tot feut prât, ès s’ botainnent â traivaiye. Ces qu’aivïnt traivaiyie po faire le grôs b’nâtie taiyainnent ènne grante ronde piere bïn piaite ch’ les sens qu’èls aipp’lainnent lai dreumainne meûle. A moitan, èlle feut creûyie, mains pe tot outre, po faire è t’ni aivâ ïn épâs rond pâ qu’ serait r’teni enson en lai tchairpente di toit. Els aivïnt fait tot âtoué de ç’te dreumainne meûle ïn épâs bodge po r’boussaie lai grainne, qu’èlle demoéreuche ch’lai meûle. Els taiyainnent âchi ïn pâjaint rôlat en piere qu’ès poichainnent tot outre â moitan d’ïn p’tchus. L’ mairtchâ ençhaçhé ci rôlat de çhaçhes réyies en traivie. Els aipp’lainnent ci rôlat ènne ribe. Po faire è rôlaie lai ribe an y botont ïn échi en bôs bïn aiccretchie d’aivô ènne foûetche bride en fie aiprés l’ pâ. Tot l’ monde était li, bïn chur, po voûere l’ premie l’émeu di m’lïn è biè. Lai véye mouniere è brais r’vâlé l’ biè en ènne bèlle coutche ch’ lai dreumainne meûle. In hanne pregné l’ bout d’ feus d’ l’échi pe boussé d’vaint lu. Lai ribe s’ boté è virie âtoué d’ l’échi en écraisaint les grains d’ biè dôs lée. Coli f’sait ïn brut ïn pô c’ment tiaind qu’an greume. Lai Tçhaitrine cheûyait d’rie lai ribe d’aivô ènne écouve, po raimoinnaie â moitan d’lai dreumainne meûle les quéques grains qu’ s’étïnt sivès de tchétçhe sen d’lai ribe. In côp d’ rôlat d’ pus, ces grains étïnt en yote toué âchi écraisès. En ran d’ temps, ïn piein sait d’ biè feut meûyè en bèlle fïnne fairainne. Bïn pus taid, l’ soi en lai lôvrèe, les dgens n’en r’veniïnt p’ d’ ci tchaipitre de pus d’ yote hichtoire, tiaind qu’ïn contou aicmencait sai raiconte : « Cïntçhe djûenes dgens étïnt paitchis po prâtaie yos brais, vôs saites, po baîti l’ grôs môtie… ».