Publié : 25 juin 2018

Le métier à tisser

L’ métie è téchie.

Jean-Marie Moine

L’ métie è téchie.

Lai djûen’ Airie ainmait brâment les bétes. Tiaind qu’néchïnt des aignelats, èlle les v’lait aidé pâre dains ses brais po les çhaiti. C’était ch’douçat, ch’ bon tchâd d’ morayie dains ci biainc è tot fïn poi ! Regu’naint tot â traivie di tchaimpois, èlle raiméssait les pois des berbis qu’ d’moérïnt aicretchies és braintchattes des boûetchèts. Pe, en les tridoéyaint dains ses mains, èlle en f’sait des greméchés qu’en tiraint dains totes les sens, bèyïnt totes soûetches de p’tétes naippes. C’ât c’ment qu’ f’sait sai mére, mains en grôs, d’aivô lai lainne d’ yôs motons tiaind qu’an les aivait tonjus, po faire des échpèces de taipis po s’ coutchie d’tchus, obïn des tçhvieches po s’ t’ni â tchâd, lai neût. E n’y aivait p’ taind d’ poussat qu’ d’aivô d’ l’étrain ! En toûejaint les bouts d’ lainne, l’Airie aivait âchi aippris è faire de grants flès qu’èlle envôjait chus ïn bout d’ bôs. Son p’tét frére y’ en pregnait bïn s’vent po tirie drie lu des moéchés d’ bôs, des oches, en yos breûyaint d’aitieudre. Quasi tos les djoués, lai baich’natte s’ entrèpait les pois dains des fernieres en péssaint dôs lai poûetche di bacu. Mon Dûe, qu’èlle n’ainmait p’ çoli. Mains ci maitïn-li, dains l’ soraye, r’yuait ènne bèlle ferniere qu’ènne grôsse airaingne felait d’aivô tieûsain. Totes les gotiattes d’ l’enrôsâyie ferniere f’sïnt aitaint de p’téts l’airbois. L’Airie n’ sôlait p’ de beûyie ç’te téch’rainne qu’se tiutait d’ croûjie ses flès, d’ les mâçhaie d’ènne sen pe d’ l’âtre d’aivô ses grantes è fines paittes. Bogre de dôbe qu’i seus, qu’èlle se dié, poquoi qu’ çoli m’ poétche dïnche condangne ? C’te poûere béte qu’émondut, fait âtçhe de ch’ bé ! « Bèlle airaingne – dié-t-èlle en lai béte – i veus épreuvaie d’ faire c’ment toi . » Elle rité tçh’ri ïn raim’lat, n’yi léché qu’ doues braintchattes que f’sïnt c’ment les dous brais d’ènne crou qu’èlle piainté dains lai tiere. Poi laivoù qu’è fayait ècmencie ? Poi l’moitan, bïn chur. C’ât li qu’èlle nouqué son bout d’ flè. Pe èlle envôjé ïn toué d’ flè chus ènne braintchatte, ïn douejieme chus lai cheûyainne braintchatte, èlle péssé en lai trâjieme,…, pe aidé dïnche. Poidé, ç’ n’était p’ soîe d’ croûjie l’ flè d’ènne braintche en l’âtre. E s’aicretchait aidé laivoù qu’è n’ fayait p’, en des bairbes di raim’lat. Pus d’ïn côp, l’Airie feut sôle, èlle predgeait son pyiain. Mains ravoétaint l’airaingne, èlle r’trovait di coéraidge po rémondure. Aiprés pus d’ènne houre d’ôvraidge, èlle n’eut pus d’ flè. Elle se r’yevé, r’venié ïn pô en drie po meu voûere ç’ qu’ çoli bèyait. Elle ne saivait p’ encoé téchie aich’bïn qu’ l’airaingne, mains, c’était po lée, ïn premie côp. Elle pregné sai braintche en grulaint d’ pavou d’ tot faire è tchoire, pe lai poétché en sai mére. « Tïns, manman, voili ç’ qu’i aî fait po toi. » Tote tiaimu, sai mére sôrié, pregné ç’ qu’ sai baîchatte yi smonjait, pe yi dié en l’embraissaint : « Merci, mai p’tét’ Airie. » Pus d’ïn côp, èlle rècmencé sai bésaingne. Elle aivait bïn vu qu’ lai ferniere aivait bïn pus de quaitre flès qu’ paitchïnt dains totes les sens dâs l’ moitan. Elle se dié : i veus épreuvaie d’ pâre ïn raim’lat qu’é trâs braintchattes âtoué d’lai poétchouse braintche. Miraiçhe, breûyé-t-èlle, è n’y é pus fâte d’enrôlaie l’ flè âtoué de tchétçhe braintchatte, è n’y é ran qu’è l’ croûjie ïn côp d’vaint, ïn côp drie. Mains, c’ment qu’è fayait faire po aivoi des l’airbois ? Elle se musait en çoli tiaind qu’ son djûene frére r’venié di bôs d’aivô sai crattèe de p’téts fruts. El aivait les meinmyons tot baiss’nurès de roudge djus de ç’liejes. Voili, i aî trovè ç’ qu’è m’ fât, dié-t-èlle. Elle rité vés sai mére po y d’maindaie ch’ èlle poéyait péssaie ses flès dains di djus de fruts. Bïn chur qu’yi réponjé sai mére. Ensoinne, èlles écraibouyainnent des fruts dains des soûetches de baitchèts d’vaint d’y léchie mair’naie les flès : des ç’liejes po l’roudge, des blûes po l’bieû, di saivu po l’violat, des beûtchïns po l’ djâne. An f’sont l’ voi tot sïmpyement d’aivô d’ l’hierbe. L’Airie était preussie d’ téchie d’aivô les flès d’ tieulèe. Aittends ïn pô qu’yi dié sai mére, è fât qu’ les flès feuchïnt bïn sats. Dous djoués aiprés, èlle repregné son ôvraidge. Elle feut hèy’rouse tiaind qu’èlle voyé l’ airbois qu’èlle ainmait taint. Meinme le pére d’ l’Airie feut fie d’ sai baich’natte. E n’en craiyait p’ ses l’eûyes. Lu que n’ s’était djemaîs airrâtè po bïn voûere des fernieres, péssait mitnaint brâment d’ temps è les ravoétie. E r’maîrtçhé qu’les airaingnes téchïnt yôs fernieres en les aicretchaint ran qu’âtoué, â bôs di bacu. In djoué qu’ l’Airie voyé son pére tchaipujie des grôsses braintches de bôs, èlle yi d’maindé : « Qu’ât-ç’ que t’ fais, pére ? » « E bïn, te vois, i t’ veus faire âtçhe po qu’ te poéyeuches téchie pus soîe. » E piainté dous pâs d’ meinme grantou dains lai tiere. Enson pe aivâ, èl aittaitché dous tiraints en traivie. D’aivô l’éde d’ l’Airie, è nouqué â tiraint di d’tchus les flès d’ lai tchaînne. E les tendé d’aivô des pieres aicretchies â béche en doues naippes, ènne en d’vaint di tiraint di béche, l’âtre en drie. Vés l’ moitan di métie, è boté ïn soûeta d’eûv’tchure en traivie, po bïn déssavraie les flès des doues naippes. Pe, â grôs bout d’ïn pointou l’oche, è creûyé ïn p’tchus, po y péssaie l’ flè. C’ât d’aivô ç’t’ échpèce d’aidieuye qu’ l’Airie s’ boté è péssaie lai traime en lai croûjaint dains les flès des doues naippes. Elle feut lai premiere téch’rainne di v’laidge. Qu’èlle était bèlle tiaind qu’ le soi, dains sai p’téte djipatte de draip bïn réyie c’ment ïn bé l’airbois, èlle ècmençait sai raiconte : « En péssaint dôs lai poûetche d’ note mâj’natte, brr…, i m’ pregnôs aidé lai tchoupe dains des fernieres !… » J-M. Moine