Vous êtes ici : Accueil > Contes, nouvelles, chansons, presse, radio, films, pages d’histoire > Ajoie, les mots du Micou > Lés noms dés yûes, po meu compâre èt ainmaie son care de tiere .
Publié : 19 décembre 2016

Les noms des lieux, pour mieux comprendre et aimer son coin de terre

Lés noms dés yûes, po meu compâre èt ainmaie son care de tiere .

l’micou, Michel Cerf

Lés noms dés yûes, po meu compâre èt ainmaie son care de tiere .

En djasaint d’nôs tchaimps, d’nôs v’laidges, de not’ care de tiere, an ât bïn s’vent chôrpris poi lés noms de yûes qu’an y trove. È y é cés que faint sôri : lo Pairaidis, lo Frelâ (Purgatoire) o l’Enfie. D’lai san de Montfâcon, è y é meinme lo Péché. Mains ci nom ne dait’pe faire musaie en totes soûetches de croueyes pratiçhes… È vïnt de « pessou » utilijè en lai Montaigne po ènne dôlaidge, o ènne étchile po péssaie poi tchu lés murats de piere. Dali, an peut v’ni di Péché èt n’pe f’ni sés djoués ès Enfies ! Brâment de noms de yûes bèyant ât care de tiere qu’ès nammant ènne aivijaîye tchu ço qu’ès sont : ïn crât (Cras d’Hermont), ènne côte (lai Malcôte), ènne combe (lai Combe Chavat), ïn mont (Mont Terri), ènne roétche (Grantroétche, Dôs lés Roétches). Èt pe è y é cés p’tèts mots que poyant compiétaie lés noms : Tchu lai Combe, D’dôs lai Combe, Enson lai Combe, lai Peute Combe… Lai frome d’ïn tchaimp peut sôt’ni son nom : Lés Longennes, lés Coétches Raies, lo Bôs Carré. Lés Essarts (o bïn Esserts) étïnt dés bôs o dés boûetchèts que sont aivu essaitchès po en faire de la boénne tiere. Bïn dés piaîntes aint bèyi l’nom â care de tiere vou èlles védgétant : lés Fuattes (épicéa) Cherme (charme), Foidgeret (fougères), D’rie l’véye Tchéne (chêne), Lai Joux (grant bôs sains brâment de lumiere), que bèye âtçhe de poétitçhe dains : lai Joux d’Aimoué. Lai meinme aippreutche nôs condut, enson di v’laidge d’Alle, â Galaint Boûetchèt (Buisson Galant). Bïn s’vent, c’qu’an fait d’ïn care de tiere léche son nom en ci yûe : lai Fenatte ât résavrèe ïn po poitchot ès tchaimps que bèyant lo moyou foin, lai Tchènn’viere (chanvre), lai Yinnière (lin), lai Tchairboénnatte, lo Gy o lo Tchafoué (Chauffour, four à chaux). Po d’âtres yûes, èl ât pu malaîjie de trovaie l’aittaiche que lés raippreutche di frainçais. Dïnche po lés Oeuches qu’étïnt dés tieutchis dains lai boénne tiere, en mé d’lai fïn. Dïnche encoé po lo Breuil o lai Condemène, que sont dés tchaimps d’ïn chire s’gneu que lés paiyisains daivïnt soiyie pai corvèe. Lai Fâ (Fâ d’Enson) était ïn tchaimp ïn po pu grant qu’ïn djoénâ. Ç’ât l’moment d’raipp’laie qu’ïn djoénâ, c’était ç’qu’ïn hanne poyait soiyie en ènne djoénèe. Èt po f’ni, cés dous yûes â noms chi bés : Tchievrelaince, laivou ènne tchievre se peut bottaie è laincie, è rittaie, èt Lai Combe étchaippie di Bôs, po ïn p’tèt vâ que se s’rait savè d’ènne côte. L’micou Voir aussi Toponymie de Jean-Paul Prongué