Djasans

---- {Les textes présentés au concours sont publiés sur site. On peut les consulter en cliquant sur le titre en couleur.} ----

Réjultats di Concoué littéraire de lai 12^e féte caintonale di patois

Le Nairmont, tchie les Poilies (marchands de poix) Le dûemoinne 2 sèptembre 2012 {{Permies pries}} - {{« È n’y é chi p’tète moûetchatte que n’aiye sai croujatte »,}} ç’ât ïn hommaidge, en prose, aidrassie en ïn hanne qu’nos é tyittie è y é ïn pô pus d’ènne annèe. Ïn hanne pe c’ment les âtres, ïn hanne qu’aivait des tchvattes piein sai mâjon. Ç’ât bïn d’aidroit et piein de târou (tendresse) et de seinsibyetè. Nos aipp’lans chu scéne : Lai Coquatte : Pierrette Godat, di Nairmont. - {{«  Traze è tâle »}}. Ènne piece de théâtre botèe dains l’oûere di temps pai l’Ugéne, qu’an n’ préseinte pus. C’te piece ât aiyu djûe ci bon temps è Poérreintru. I seus chur que vos étes brament è l’aivoi aippiadji et qu’vos èz bïn riè. Nos aipp’lans l’Ugéne, Michel Choffat, de Boé. - {{« Lai trâjieme mé-temps »}}, en patois d’lai sen de Banvlè (Banvillars), aivô quéques diffreinces d’aivô l’ nôtre, mains piein d’ savou et de poésie. Ç’ât l’hichtoire d’ènne virie é Pairis po ïn match de rugby et â r’to, è câse di temps, tot ât éçhaboulè ! Lai vétchaince é tchaindgie poche qu’è n’y è pus d’éyèctrichitè, les vies sont copèes, è fât aippâre è vivre âtrement. Nos aipp’lans François Busser, de Banvlè, qu’aivait po d’vise : « Tote séjon aimoène moûechon ». -{{« Lai grosse soi des Taignons »}}, en patois de Laidjoux, nos aipprend ou bïn raippeule tot ç’ qu’ ât aiyu entrepris po aimoènaie l’âve chu le Hât-Piaité, da l’ Vâ de Saint-Mie. Ïn tot bé traivaiye d’airtchivichte, aivô brament de détayes, qu’è moènnè Raphaël Brahier, de Laidjoux et qu’nos aipp’lans chu scéne. ---- {{Doujiemes pries}} - {{« Po not’ bé câre de tiere »}}, quaitre fables de Lai Fontaine, brâment bïn trâdutes en patois èt peus ènne bïn piéjainte et aimusainte aidaptation di {{« Crâ èt peus di r’naid »}}. Ç’ât ainco not’ Ugène qu’é graiynè çoli. C’ment èl é dje r’ci ïn permie prie, è n’sairè en r’cidre ïn doujieme po ci traivaiye. Le djury vos dmainde tot d’meinme de l’aippiadgi ainco ïn côp. Le loup et l’agneau, Lo loup èt l’aigné Le laboureur et ses enfants, Lo labouérou èt ses afaints Le loup et le chien, Lo loup èt lo tchïn Le corbeau et le renard, Lo cra èt pe lo rnaid La grenouille et le boeuf, Lai rainne qu’se veûche faire aiche grosse qu’lo bûe - {{« Tchu les Roitches »}}, ènne piece de théâtre aivô des r’sannainces d’aivô ènne âtre piece djûe è Laidjoux è y é dous ans. Mains ci côp, ç’n’ât pus po ïn golf qu’an veut aitch’taie des tieres, mains po conchtrure des HLM. Ènne piece bïn graynèe, qu’ chent bon lai tiere des Fraintches-Montaignes et qu’ fait bïn rujolaie aivô lai djoènnèe de traivaiye de trâze houres, poch’qu’an fait les nuef èt peus les quaitre. Nos aipp’lans chu scéne Eribert Affolter, di Nairmont. - {{« Ïn eurconte des ïnduchtriâs m’lïns è oûere tchu les tchaipurons di Jura »}}, tote ènne hichtoire en prose, è y é tchïnze copyèts !, po r’veni chu l’ probyème des m’lïns è oûere de St Brais et d’âtres yûes des Fraintches – Montaignes. Bïn des rtroves (trouvailles), brâment d’échprit, de fotrâye (ironie) des côps ïn pô grïnçainte. Nos aipp’lans chu scéne Jean-Marc Juillerat de Yovlie. - {{« Charlotte et Nicolas »}}, aijbïn ènne piece de théâtre, mains en patois de lai Hâte-Saône, graiynèe et djûe pai l’aichôchiâchion des patoisaints « Les D’gens de tchie nos ». Ç’ât ïn patois tot piein diff’reint di nôtre. Taint d’chaince, lai trâduchion en frainçais nos é bïn aijietè lai yéjure et lai compregnoure. C’ment le r’cognât Michel Lentz, le graiynou, ç’ât ènne coumeudie d’lai campaigne, ïn pô lèchte et lardgiere, c’ment lai tchainson de Sacha Distel. Nos aipp’lans Michel Lentz, d’Echavanne. - {{«  Tiere d’Aidjoûe »}}, ïn tot bé poéme, mains ïn pô cot po l’djury, - nos en airïns voyu ïn pô pus - graiynè pai lai Graibeusse. Ïn poéme qu’chent bon les çhoés des tchaimps, le paitchi-feû et l’aimoè di paiyis. Nos aipplans Christiane Lapaire de Fontenais. ---- {I rméchie mes aimis di djury, Norbert Brahier et Michel Etique, et tote lai rotte di comitè d’organisâtion de cte bèlle féte po loute traivaiye. Que vétieuche le patois ! Soyhières, le 7 de djuyèt 2012 Denis Frund} ----