Vous êtes ici : Accueil > Contes, nouvelles, chansons, presse, radio, films, pages d’histoire > Pages d’histoire > Coutumes > Ç’ ât l’ tchâtemps, les condgies r’veniant
Publié : 19 août 2018

C’est l’été, les vacances reviennent

Ç’ ât l’ tchâtemps, les condgies r’veniant

poi A.-M. Kasteler, défâtè, en sai d’mainde poi J-M. Moine

Ç’ ât l’ tchâtemps, les condgies r’veniant (poi A.-M. Kasteler, défâtè, en sai d’mainde poi J-M. Moine) Note p’téte rotte de ché dgens d’ lai famille, nôs sons paitchi po San Vincenzo, dains ci bé câre de tiere d’Italie, lai Toscane. Nôs sons airrivè en l’ aibardge qu’ se trove dains ïn bôs d’ vois tchénes de taiyies â long d’ lai mèe. Aiprés aivoi randgie les entchétres, fait ïn toé d’ lai bèlle mâjon, nôs pregnainnes l’ aipéro d’ beuv’niaince pe nôs f’sainnes chutot ènne boinne marande d’vaint d’ allaie dremi dains ïn bon yé, brecie poi l’ brut d’ lai mèe. Mon Dûe, qu’ ç’ était bé, an s’ sairait craiyu â pairaidis ! Les condgies ècmençant di bon pie ch’ an peut dïnche dire ! Lo lend’main, bïnhèy’rouse d’allaie dains l’ âve, ènne p’téte mèerèe é coitchie ïn roétchie. Mon pie caqué contre, è voili mon grôs l’ atchaye piein d’ saing. Lo pie m’ fait mâ, i aî d’ lai poinne è mairtchi. Ran n’ ât rontu, ç’ ât des beugnes ! Çoli m’ é brâment empâtchie d’ naidgie, poch’qu’ è fât mairtchi ènne boussèe po trovaie d’ l’ âve djuqu’ en l’ embreuye, è pe l’ fond d’ lai mèe n’ ât p’ pyait. Dâli, i aî portchaiyie d’ lai grôsse begnoûere. I seus t’ aivu fruchtrè po regu’naie dains l’ bôs pe â long d’ lai mèe. Aivô d’ lai yéjure, i m’ sietôs chus ènne grante sèlle dains l’ châbion, en lai rivatte d’ lai mèe, pe i beûyôs totes soûetches de dgens qu’ péssïnt poi li : des bèlles, des peutes baîchattes frindyè en môtre-tiu ! È péssait âchi des djûenes boûebes que f’sïnt des migats l’ eûyes és baîchattes, des bèlles daimes qu’ se craiyïnt encoé djûenes pe qu’ se r’drassïnt c’ment qu’ des soûetats d’ faiviôles. Brâment d’ afaints djuïnt dains l’ châbion d’aivô yôs pairents, f’sïnt des tchétés, ritïnt d’ totes les sens, djôtïnt en lai p’lote. Dâli, mâgrè les aiccreus d’ mon pie, l’ oûere des condgies était li d’aivô ènne boinne ambiainche, ènne boinne tâle, di bon vïn piein de s’raye… A.-M. Kasteler (18 de djanvie 2008)