Publié : 1er août 2018

Montfaucon

Montfâcon

Thérèse Frésard, Voiyïn SJE

Gravure de Beuret-Frantz

Montfâcon

(Helvétie, djoué d’ lai Sïnt-Nicolâs ; Thérèse Frésard, décembre 2010)

Ïn nom qu’ me fait tchâd â tiûere, ç’ ât ç’tu d’mon v’laidge. È quéques kilométres de Montfâcon, è y é ènne bèlle fèrme qu’ an y’ dit les Peignieres. Ç’ ât li qu’ pai ïn bé djoué di paitchi-feû, ènne cigoégne, de péssaidge poi li, léché tchoire ïn p’tét paiquèt dains ïn boquat d’ violattes, totes de sentou. Sôrprije : ç’ ât ènne p’téte baîchatte, ç’ ât moi qu’ vïns aigranti ènne frat’rie d’ cïntçhe afaints. I èc’mence de coégnâtre Montfâcon è ché ans. I pais po
l’ écôle en cheuyaint les pus grôs pai tos les temps, dains l’ fraid, dains lai pieudge obïn lai noi, dôs des capes djuqu’è moitie di ventre. Nôs empoétchïns ïn mâgrelat boussgnon po note dénè, qu’ était tot édgealè, c’ment nôs. Nôs f’sïns tot çoli sains dj’mais gronç’naie. Note écôle n’ était p’ l’ uni, mains ç’ ât li qu’ i seus dev’ni ènne saivainne.
Montfâcon, ch’le piaité des Fraintches-Montaignes n’ sairait étre vérèvè en piepe ïn âtre yûe d’ lai Suisse. Lai biâtè des paiyisaidges ât dains les grantes è pairch’mennées pétures de grôs saipïns, laivoù qu’ è y é tot piein d’ étaings. L’ tot r’sanne en ènne pran laivoù
qu’ dgeaimbèyant polains, djements, vaitches è vaitchattes.
Le v’laidge de Montfâcon s’ aillondge â tchaipâ di d’rie beûye aivaint lai fonje copure di Doubs. L’ cieutchie di môtie s’ drasse è mil métres en aimont. Dâs li, an peut voûere â sud,
l’ Mont-S’raye, le Tchaiss’râ, pe pai çhai temps, les biernoises Alpes. Â nord, ç’ ât lai Fraince, l’ Çhô di Doubs, l’ Lômont, pe pai bé temps, les bieus capirons des Vosges.
Montfâcon n’ é p’ de grôsse mill’nâ pe airiolouje hichtoire. L’ défritchaidge di hât piaité feut faivri poi lai Tchaîrte de fraintchije de 1384, octrayie poi l’ prïnce de Baîle ç’t’ Imie
d’ Ramstein. Lai vétçhainche des dgens ât aivu c’té d’ laibouérous, d’ humbyes évoingnaints,
d’ bésaingnous l’ ôvries qu’ vétçhïnt chus ènne eur’vijainne tiere, dôs ènne dure aiçhaile.
Montfâcon ât l’ pus véye v’laidge des Fraintches-Montaignes. L’ premie graiy’nat chite Mons Falconis, en 1139. L’ peupye vïnt d’ lai contrèe d’ Sïnt-Ochanne, poi Soubey dains lai bairoitche de Montfâcon. Dâs le onjieme siecle, djainqu’ â sajieme siecle, la bairoitche de Montfâcon ât l’ paitronnaidge de sïnt Djeain-Baptiche que comprend totes les Fraintches-Montaignes.
L’ vinte è yun d’ mârs 1793, lai tieum’nâtè fait è saivoi son entçh’vâ po ènne yibre république, nian p’ po ènne r’yunion en lai Fraince.
En 1813, pus que dj’mais, les miout’nâchions pâjant foûe chus ïn peupye aippoéri poi vinte annèes d’ étraindge otiupâchion.
Adjd’heû, l’ yûe sôrât en l’ aiv’ni.

Quéques noms d’ mon v’laidge :
1139 : Monsfalconis / 1400 : Montfalcon / 1423 : Falconismons / 1454 : Montéfalconis /
1461 : Montfaulcon ou Montagne du Faucon.