Publié : 1er août 2018

Marie-Barbe

Lai Mairiebaîrbe

Thérèse Frésard

Lai Mairiebaîrbe

(poi Thérèse Frésard, l’ vinte-nûef d’ aivri 2013)

I veus vôs raicontaie ènne bèlle hichtoire que s’ ât péssè è y é grant, dains ïn p’tét câre de tchie nôs. L’ Pierat, ïn soi, d’rie lai grôsse tâle d’ lai tieûjainne était en train d’ se musaie en lai foire de Sain’leudgie laivoù qu’ è v’lait allaie l’ lend’main. Voili qu’ an caque en lai poûetche. Entrèz, qu’ dit l’ Pierat. È lai véye Mairiebaîrbe s’ en vïnt, tote petéte, tote corbatte, tot reintri c’ment qu’ ènne reinnètte â bon temps. Échtiusètes-me Pierat, pe bonsoi en vôs Dgen’reuse (lai fanne di Pierat). I v’niôs vôs d’maindaie che vôs poérïnt m’ pâre chus vote tchairat po allaie è Sain’leudgie, d’main l’ maitïn. Mains bïn chur Mairiebaîrbe, mains qu’ ât-ç’ qu’ vôs allèz faire è Sain’leudgie ? I m’ en vais en l’ hôchpiche. De quoi, vôs nôs léchietes, yè, qu’ ât-ç’ è dire ? Que v’lèz-vôs ? I n’ aî pus niun. I aî d’maindè en M’sieu l’ tiurie
d’ poyait m’ en allaie en lai mâjon des véyes, è i veus allaie voûere. L’ Pierat ne dié ran, pe
l’ lend’main l’ maitïn, lai Mairiebaîrbe s’ en allé daivô lu en lai vèlle. Tiaind qu’ ès feunent tot enson d’ lai côtatte, dâ laivoué qu’ an voyait le v’laidge po l’ derie côp, lai poûere Mairiebaîrbe s’ boté è pûeraie d’ grôsses laîgres qu’ èlle pannait bïn, mains que n’ satchïnt p’ en r’couaint aidé. Qu’ èz-t-vôs mére Mairiebaîrbe qu’ dié l’ Pierat ? Ç’ ât le d’rie côp qu’ i vois le v’laidge voé qu’ i aî vétçhu quaitre-vints ans d’ temps, pe è m’ en ât grie. L’ Pierat s’musé ïn p’tét côp, râté son tchvâ è son tchairat, pe r’viré d’ lai sen di v’laidge. Yè, qu’ faites-vôs Pierat qu’ dié lai Mairiebaîrbe ? I m’ en r’vïns en l’ hôtâ, i aî rébiè âtçhe. Hûe Bichette, aittieu ! Èls airrivainnent â v’laidge, pe l’ Pierat s’ enframmé daivô sai fanne Dgen’reuse dains l’ cabolat â long d’ lai tieûjainne di temps qu’ lai Mairiebaîrbe boiyait ènne étçhéyatte de noi café pe maindgeait ènne grôsse laîtche de pain aivô di burre pe d’ lai confreture és aiméres.
Dis vois Dgen’reuse dié l’ Pierat en sai fanne en lai sarraint conre lu : nôs n’ ains p’d’afaints, ç’ ât note mâlhèye, i l’ sais aîch’bïn qu’ toi. Nôs aivïns djâbiè d’ allaie en l’ oûrphelinat po tiure ïn oûrphelïn, è t’ en s’vïnt ? Tochu qu’ i m’ en raippeule, Pierat, mains voé veus-t’ en v’ni ? En çoci, Dgen’reuse : ch’ en lai piaice d’ aidoptaie ïn afaint, è nôs v’niait és dous
l’ aivisâle d’ aidoptaie ènne grant-mére, qu’ ât-ç’ que t’ dirôs ? Lai Dgen’reuse que n’ aivait dj’mais meu poétchè son nom, n’ dié ran ; pe â bout d’ ènne boussèe : Fais c’ment qu’ te veus, Pierat ! Les dous s’ en allainnent eur’trovaie lai Mairiebaîrbe qu’ aivait quâsi fini tot l’ potat d’ noi café. Ès yi diainnent ço qu’ ès s’ étïnt musè. Lai véye Mairiebaîrbe se boté è pûeraie encoé pé qu’ chus l’ tchairat.
Èlle s’ en ât v’ni è quasi ceint ans. Ç’ ât li qu’ i l’ aî vu ïn djoué que churvayait ïn bé popon, le premie pe l’ seingne afaint di Pierat pe d’ lai Dgen’reuse qu’ ât tchoi â monde aiprés tçhïnze ans d’ mairiaidge. Aidonc, è y aivait encoé des miraîçhes…

Raidjout : i m’ seus pèrmi d’ botaie ïn nom en ç’t’ hichtoire (J-M. Moine)