Publié : 28 juin 2018

Les éléphants

Les éléphants

Eric Matthey

Les éléphants

Tchétçhe annèe, â mois de djuïn, le cirque Knie vïnt dains not’ vèlle po quéques djoués. Tiaind qu’ i étôt boûebat c’t’airrivaie était ènne véritabyie féte pochqu’ i ai toudjoué ainmè l’cirque d’aivô ces évoingnous è pe ces bétes que v’gnant d’ tos les cares d’ lai tiere. De pus ç’qu’ât ïntéressaint, ç’ât qu’ èl airrive poi l’train è pe qu’ tote lai ménaidg’rie dait traivoichie lai vèlle, d’ lai diyaire d’junqu’ chu l’ tchaimp d’ foire laivous’ qu’ è s’ ïnchtalle.

Po les afaints, è pe po les gros âchi, lai r’preujentâchion écmencait dje tot comptant â moment laivousqu’ les ainimâs soûetchïnt feu des wagons po tcheum’naie chu les vies djunqu’â tchaimp d’foire.
Bïn chur qu’nôs n’ poéyïns’ p’ voûere les fâves bétes que dmoérïnt enfromè dains yotes caidges. Mains chu lai vie è y’ aivait quasi totes les âtre bétes. Des tchvâs de totes raices è de totes reubes, t’nis â bridon poi yotes soingnous, mairtchïnt tot ailouxi dains l’ traifitçhe. Des aînes cheûyïnt, è pe des tchaimés, des zébres, les laimas… C’était quasi l’Airtche de Noé.
Mains c’ qu’ nôs ïmpréchionnait l’ pus, è bïn c’était les éléphants, ces grosses bétes qu’ tcheum’nïnt tot bal’ment, sains brut, c’ment ch’ és l’aivïnt botè des paintoufyes. Èls allïnt les üns drie les âtres en se t’niaint poi lai quoûe d’aivô yote trumpe, dâ l’pus gros â pus p’tét. Nôs ains même vu ïn côp le p’tét drie tçhittie lai quoûe po vite allaie dérobaie ènne salaidge chu lai d’vainture d’ïn mairtchaind d’ lédyumes. I n’ai p’ fate d’ vôs dire que ç’ tu-ci n’é ran épeurvè d’ faire po l’en empâtchie ! Çoli nôs aivait bïn aimusè.

Çoci dit, i dais vôs aivouaie qu’ i ai encoé mitnaint di piaigi d’ voûere péssaie lai ménaidg’rie di cirque Knie d’aivô cés bétes che bïn entret’ni è qu’aint brâment de djèt.

Djeût’ment, l’annèe péssè, tiaint qu’i y seus allè, i ai trôvè tras bon véyes, l’ Pierrat, le Lexandre è pe l’Djosèt sietè chu ïn murat, en aittendaint l’cortége des ainimâs. È fât dire qu’ès sont mitnaint tos les tras dains ènne mâjon d’véyes è pe, bïn chur ès n’y ains pe brâment d’ quoi s’ traibâtchie, chutôt qu’ès sont encoé les tras d’ bons véçhiains. Dâli ès trôvant totes les s’nédes po ïn po soûetchie, è pe l’ dénèevaidge di cirque en ât yènne !
Mains, n’voili pe qu’ l’ almônie tiurie d’ lai mâjon d’ véye pésse poi li è pe qu’è yos d’mainde :

Qu’ât-ce qu’ vôs faites li d’ bon maitïn ?

Vôs voites, Môssieu l’ tiurie, qu’ yi réponjé l’ Pierrat, nôs aittendans d’ voûere péssaie les éléphants di cirque. È pe meinme, qu’ raidjoute le Lexandre, qu’ ç’ât aivu graiy’nè chu lai feûye, que c’t’ annèe, chu l’dos d’ ces éléphants, è yi veut aivoi des fannes totes nu.

È bïn, qu’ diét l’ tiurie, i veus dmoéraie po aittendre d’aivô vôs poch’qu’ çoli fait bïn grand qu’i n’ai p’ vu… des éléphants !!!

Les Foulets, le 27 d’aivri 2012 Eric Matthey