Publié : 27 juin 2018

La boutique magique

Lai boutiçhe maîdgique

Eric Matthey

Lai boutiçhe maîdgique

An m’ont raicontè ènne hichtoire qu’vïnt d’ se péssaie dains ènne vèlle de tchie nôs. Djeûte laiquèlle, i ne l’ vôs p’ sairôs dire. Mains che c’t’hichtoire m’é rétchâdè l’tiûre èlle m’é âchi fait è djâbyaie â senche d’not’ vie !

Ïn djoué ïn hanne aippregné qu’è s’était eûvi dains sai vèlle ïn maigaisïn dains l’qué an poéyait tot aitch’taie, mains vrâment tot. Èl eut bïn chur d’lai poinne d’le craire. Èl en v’lé aivoi l’ tiûre nat è pe di côp épreuvaie d’ défiaie l’mairtchaind.
Aidonc, è poinne qu’è feut entrè dains l’maigaisïn, l’vendou lu d’maindé :

Qu’ât-ce qu’è vôs fré piaigi, Môssieu, qu’ ainm’rïns-vôs qu’i vôs vendeuche ?

È bïn voili ! I vorôs bïn è maindgie po tos les dgens d’lai tiere. Qu’ an n’oûeyeuche
pus d’jmais d’jâsaie d’ faimainne dains l’monde, è pe encoé qu’ tchétiün ayeuche
toudjoué d’ l’âve è son sô.

Ç’ ât tot ? qu’ lu d’maindé l’âtre en gray’naint lai d’mainde chu ïn biat.

Ô Dé nani, ç’n’ât’ p’ tot ! I vorôs aichbïn lai paix entre tos les peupyes è pe
qu’ les rétches aideuchïnt les poûeres po qu’ tot l’monde vétieuche bïn sains diff’reinces.

L’mairtchaind grayonne tot çoli chu son biat d’vaint qu’ d’encoé d’maindaie :

Ât-c’que çoli s’ré tot po ci côp ?

-  Nian, nian ç’nât ‘p’ encoé tot ! I aim’rôs encoé brâment pus d’ aittenchion pairvâ
not’ piaînatte po qu’ nôs p’téts l’aifaints lai trôveuchïnt c’ment qu’nôs l’ains r’ci d’nôs
véyes dgens. Qu’és poyeuchïnt c’ment nôs ôyi le tchaint des oûegés, heûmaie lai
sentou des çhos è pe s’émervoiyie poi totes les soûetches de bétes è d’piaîntes qu’nôs
airains poyu empâtchie d’ s’éteindre. En quéques mots, è fât qu’ nôs airrâteuchïns de tot fotre en l’air en maichacraint c’te bôle.
Voili, ç’ât prou… po l’ môment !

Aiprès avoi tot ïnchcrit chu son p’tét yivrat, l’mairtchaind vait dains son airriere maigaisïn po aiyûere lai c’mainde. Aiprès ènne boussiatte è r’vïnt d’aivô ïn tot p’tét saitchat qu’ t’niait dains l’creû d’lai main è le r’bote en not’ hanne.
Tot écâmi d’ voûre ïn che p’tét paiquèt po tot c’ qu’èl aivait d’maindè c’tu-ci lu fait paît d’ son ébâbéch’ment.
Dâli l’vendou lu dit :

Désôlè Môssieu, chi, nôs n’vendans p’ les fruts, nôs n’ feunéchans qu’ lai graînne !

Les Foulets le 9 de décembre 2010 Eric Matthey