Vous êtes ici : Accueil > Contes, nouvelles, chansons, presse, radio, films, pages d’histoire > Fôles, contes, nouvelles > Quéques boussèes d’ mes seûv’nis d’afaince
Publié : 27 juillet 2018

Quelques moments de mes souvenirs d’enfance

Quéques boussèes d’ mes seûv’nis d’afaince

A.-M. Kasteler

Quéques boussèes d’ mes seûv’nis d’afaince

poi A.-M. Kasteler Çoli s’ péssait en ç’te bèlle séjon d’ l’ hèrbâ, tiaind qu’ i allôs vadgeaie nôs vaitches â tchaimpois. Èlles étïnt bïn étréyies, mes vaitches, daivô yôs quoûes bïn décrïnnèes. Quéqu’ côps, i pregnôs ènne aimie daivô moi. C’ment qu’ nôs n’ vadgïns ran qu’ trâs vaitches, çoli nôs bèyait l’ temps d’ s’ aimusaie. Nôs fsïns di fûe, pe nôs tieûjïns des pommattes qu’ nôs trovïns dains l’ eûtche, poi li, â long di tchaimpois. Çoli f’sait des boinnes quaite. Aivô lai noire pée des pommattes, nôs se fsïns des mouchtaitches c’ment que ç’té d’ ci Dali, lo fraiyou (sains l’ coégnâtre). Note Denis, mon frére, allait l’ dûemoinne â tchaimpois, â câre di bôs « Côte Tchaimp Françon ». Èl aivait fait ïn p’tchus, daivô poi d’tchus des baleinnes de parapieudge ; çoli f’sait ïn bé foéna. Ènne vâprèe qu’ i étôs â tchaimpois tot d’ pai moi, i aivôs aippoétchè d’ l’ hôtâ ènne p’téte tçhaisse, di socre, ïn pô d’ burre po faire des loitch’ries (cainnamèyes) chus ci foéna. I pregné mai tçhaisse, çhaité mai Fleurette, lai pus dgenti d’ nôs trâs vaitches, taitgné les traiyons pe épreuvé d’ aivoi di laicé. Èlle me r’boussé tot bal’ment aivô ènne tchaimbe, i tchoiyé chus l’ tiu. Hèy’rouj’ment, lai Fleurette n’ m’ é piepe fait mâ ; poidé, ç’ n’ était p’ l’ houre d’ lai tréte… Ïn âtre djoué, i aî r’fait di fûe dains ci p’tchus, mains i aivôs pris ci côp-ci, en l’ hôtâ, l’ laicé, l’ socre pe ènne poutratte po remb’naie. È voili qu’ mes loitch’ries étïnt boinnes ! Des côps, mai manman m’ bèyait d’ lai laînne po tchâss’naie des tchâssattes po l’ heuvie. Qué traivaiye ! I ainmôs meu yére è ravoitie les bèrbijattes dains l’ cie, â d’tchus d’ lai che bèlle naiture en hèrbâ, aivô totes ces tieulèes. Dains mai lactaîtche, i botôs di pain, des beûtchïns, d’ lai yéjure. Quéques côps i pregnôs âchi di touba Burrus, aivô dous trâs feuyes de paipie è cidyairattes d’ ci roudge r’tieuy’rat de « La Croix », qu’i aivôs raivi dains lai baigatte d’ lai bieuve véture de mon chér pére ! I v’lôs môtraie qu’ i étôs grante c’ment qu’ mes trâs fréres. Mains, i n’ saivôs p chi bïn qu’ mon pére, rôlaie les cidyairattes. Des côps çoli r’sannait en des cigâres…, ou bïn en des macaronis. Aiprés doûes feuf’nèes, i en aivôs prou… En r’vegnaint en l’ hôtâ, i boiyôs d’ l’ âve â bené, pe rétiurôs mes deints. C’ment çoli, i n’ sentôs p’ lai f’miere. Que d’ bés djoués i aî péssè dains lai naiture ! Le 7 de djanvie 2005