Publié : 27 juin 2018

Le rémouleur

Le r’môlou

Jean-Marie Moine

Le r’môlou

Ènne baîchatte, lai Yâdine, vétçhait d’ aivô ses pairents, quéque paît dains l’ Jura. Son pére, le Grôs Djaîtçhes aivait r’pris lai p’téte foûerdge de son pére, pe s’était botè è faire totes soûetche de novés l’ utis. En airtijaint qu’ èl était, c’ était yun des premies taiyaindies di paiyis. Â long di fûe pe d’ l’ ençhainne ç’ ât en lai foûeche des brais qu’ son maitché fiait chus les roudges pieces de fie. D’aivô ïn aîne, lai Yâdine allait poétchaie és paiyisains d’ ci câre de tiere les utis qu’ aivait fait son pére. Ïn bé djoué, èlle trové ïn djûene hanne qu’ s’ aipplait Djeain, pe qu’ rôlait d’ ènne mâjon en ènne âtre po trovaie di traivaiye. Les eûyes di djûene hanne piaijainnent tot comptant en lai djûene baîchatte. Dis voûere qu’ dié lai Yâdine â Djeain, craibïn qu’ mon pére airait fâte d’ ïn ôvrie. Te sais, è n’ ât pus tot djûene. I ainmrôs bïn qu’ te v’nieuches d’aivô moi en l’ hôtâ po yi s’mondre ton éde. L’ Djeain qu’ n’airrâtait p’ de raivisaie les grants è bionds pois d’ lai baîchatte, feut d’ aiccoûe. È feut bïn r’ci poi les pairents d’ lai baîchatte. C’ment qu’ è ne r’tchegnait dj’mais en lai bésaingne, è feut bïntôt ïn bon taiyaindie. C’ment qu’ yi diait aidé l’ Grôs Djaîtçhes, l’ pus du dains l’ métie, c’ ât d’ bèyie l’ bon fi és utis. Chutot, èl airait aidé v’lu poéyait péssaie tchie les dgens po rédiujie les utis aiprés qu’ è yôs les aivait vendus. Dje d’ ci temps-li, è fayait cheûdre â meu lai clientèle, po bïn diaingnie son pain. L’ Djeain s’ éffoûeché d’ aippâre défïnmeu è r’bèyie l’ fi. Tiaind qu’ è feut bïn capabye dains ç’te paitchie di métie, l’ Grôs Djaîtçhes l’ envié tchie les dgens po raiffilaie les utis, pe po raimoinnait ces qu’ è fayait r’foûerdgie. Sâf bïn chur tiaind qu’ lai Yâdine allait d’ aivô lu, è r’veniait sôle le soi en l’ hôtâ. L’ riffaidge, tot ïn djoué, des utis chus ènne soûetche de piaite piere yi bèyait les doigts en saing pe y’ érouéy’nait les brais. Tchaince qu’ è y aivait des dûemoinnes, tiaind qu’ èl allait d’aivô lai baîchatte vandlaie envirvô. Ès djâsïnt de tot pe d’ran, mains p’ encoé d’ aimoé. Poétchaint, èl aivait ôyi ïn djoué l’ Grôs Djaîtches dire en sai Dièfine : « I crais bïn qu’ ènne airaingne fele â long d’ nôs ! ». Qu’ ât ç’ que çoli v’lait dire ? È n’ oûejait p’ le d’maindaie. Ïn soi tot d’ meinme, èl en djâsé en lai Yâdine qu’ en feut tot r’virie. Lée, èlle saivait ! È bïn yi dié-t’èye, dûemoinne qu’ vïnt, i t’veus môtraie âtçhe, mains te te n’ veus p’ engraingnie â moins ? Bogre de dôbe qu’ è y’ réponjé. L’ cheûyaint dûemoinne, ès paitchainnent les dous dains l’ bôs. Lée, ravoétait tot âtoué, enson des braintches, aivâ dains lai r’venûe. Tot d’ ïn côp, èlle s’ airrâté pe pregné lai main di Djeain dains lai sïnne. Ravoéte d’vaint toi ! D’ aivô ses paites, ènne airaingne envôjait sai proûe dains lai ferniere. I seus dous côps beûjon breûyé-t-é en embraissaint lai Yâdine. Ç’té-ci, en grûlaint pe en çhoûejaint ses eûyes yi dié : « Ïn côp, è m’ le sannait qu’ t’ étais beûjon, mains l’ doujieme côp… ? ». Aittends ïn pô, yi dié-t-é, t’ le veus dj’ bïn saivoi. Te sais, ç’ ât toi ç’te p’téte airaingne qu’ i ainme étre prij’nie des douçats brais. Mains ch’ tot vait bïn pe ch’ t’ le veus mai p’téte airaingne, te srés aidé li â long d’ moi, po m’ édie d’ tes dous brais è virie lai piere. C’ était l’ toué d’ lai baîchatte d’ étre tiurieûse de saivoi. Virie lai piere ? Mains, èlle ne dié ran, hèy’rouse qu’ le Djeain l’ aiveuche embraissie ! En r’veniaint, ès f’sainnent ïn grôs détoué, pe se r’molainnent s’vent en s’ coitchaint d’rie les aîbres. Lai Yâdine aivait ïn piein tiûere d’ ïn brêulaint aimoé, l’ Djeain n’ aivait d’ eûyes qu’ po les grants è bionds pois d’ son… airaingne. L’ yundi tot â maitïn, l’ Djeain d’maindé â Drôs Djaîtçhes ch’ èl oûejait pâre lai grôsse piere qu’ était dains ïn câre d’ lai foûerdge. C’ était ènne pierre qu’ ïn viaidgeou que v’niait des Vosges, y’ aivait étchaindgie contre des utis. È lai vadgeait en r’praindge po en faire des molattes. L’ Djeain raiconté l’ aivisâle qu’ y aivait péssè poi lai téte tiaind qu’ èl aivait vu l’ airaingne. È bïn, qu’ dié l’ Grôs Djaîtçhes, è fât épreuvaie po voûere ç’ que çoli veut bèyie. Ès tirainnent yôs pyans. L’ Grôs Djaîtches s’ tchairdgé d’ l’ aissut’naint traivaiye d’ lai taiye d’ lai grôsse piere. Èl en fsé ènne bèlle ronde ribe qu’ è poiché â moitan, di temps qu’ le Djeain foûerdgeait les pieces d’ ïn échpèce de tch’valat è quaitre pies. Po faire è virie lai ribe, è pyèyé tot sïmpyement l’ aîbre en ïn bout. È v’niait d’ ïnventaie lai coérbatte ! Ès n’ aivïnt p’ v’lu qu’ les fannes v’nieuchïnt voûere ç’ qu’ èls étïnt en train d’ djâbiaie. I me d’mainde qué soûetche de rèt yôs é péssè poi lai téte, diait lai Dièfine. Léche-les faire, réponjait lai Yâdine. Ch’ le pére s’ y ât âchi botè, i seus chur que ç’ n’ ât p’ ènne beûjonne aivisâle. An montont lai r’môlouse. L’ Djeain viré lai coérbatte, l’ Grôs Djaîtçhes péssé lai laime d’ ïn couté ch’ lai ribe. È n’aivait dj’mais vu ïn uti aich’bïn édiujie. Vais tçh’ri les fannes dié l’ Grôs Djaîtçhes. Lai Yâdine s’boté tot comptant è virie lai coérbatte, sains poinne, di temps qu’ le Djeain r’ péssait l’ fi d’ ènne fâ ch’ lai ribe. Mon Dûe qu’ ç’ ât bé qu’ dié lai djûene baîchatte en sâtaint â cô di Djeain. I m’ rélâdje dje d’ te cheûdre po t’ édie dains ton traivaiye en viraint lai coérbatte. Mitnaint, èlle saivait ! Po ènne airaingne, dié lai Dièfine en r’paitchaint vés son foéna, ç’ en ât yènne… ! J-M. Moine .