Publié : 26 juillet 2018

La Saint Fromont (ou Saint Fromond)

Lai Sïnt Fromont (ou Sïnt Fromond)

Eribert Affoler

Lai Sïnt Fromont (ou Sïnt Fromond)

poi Eribert Affolter

L’ Djôsèt è l’ Aigathe aivïnt déchidè d’ allaie en lai Sïnt Fromont po fétaie loues quairante annèes d’ mairiaidge.

Vôs saites qu’ lai Sïnt Fromont ç’ ât l’ djoué qu’ cheût l’ Aichenchion. Ïn vardi, ç’t’ annèe-li, çoli bèyait tiaind qu’ le mois d’ mai èc’mence.

Lai voiye â soi, tot était prât, ènne novèlle véture po l’ Djôsèt è pe ïn nové d’vaintrie po ç’t’ Aigathe. È s’ fât musaie en tot. Po l’ révaye maitïn, è y aivait ç’te Mignonne, loue vaitche. Ès n’ aivïnt p’ fâte d’ aivoi pavou d’ se rébiaie, tos les maitïns, és cïntche ïn quât lai Mignonne était révayie. C’ était l’ houre d’ yi bèyie è maindgie. Po çoli, l’ Djôsèt n’aivait p’ fâte de grelat. Ès sâtïnt d’ feû di yét pe èls èc’mencïnt d’ govèrnaie. L’ djoué n’ était p’ encoé y’vè. Ç’ ât qu’ èls aivïnt d’ l’ ôvraidge d’vaint d’ allaie pâre ci tch’mïn d’ fie.

L’ Djôsèt daivait aiffûere ç’te Mignonne, l’ Aigathe daivait bèyie è maindgie és dg’rainnes, â vée, és tchaits è pe és poûes. Ç’te Mignonne n’ aivait pus d’ laicé pochqu’ èlle allait aivoi ïn p’tét vée dains les djoués qu’ verïnt. Çoli airraindgeait ci Djôsèt qu’ aivait bïn di mâ d’ s’ otiupaie d’ loue. Ès poéyïnt mit’naint allaie pâre le train. Ènne mairtche de trâs quâts d’ houre. Ès montainnent Lai Fenatte, â drèt daivô l’ soraye laivoù qu’ è y aivait encoé des cramias, p’ ès déchendainnent Dôs les Crâts, è l’ envie. Li, an trovait encoé des tchiâs d’ vée. Ès péssainnent d’vaint lai leudge d’ ci Lélé qu’ était dj’ â d’vaint l’ heû, pe ès s’ enf’lainnent aivâ Lai Combe. L’ tch’mïn d’ fie était dj’ li tiaind qu’ èls airrivainnent tchus l’ crâtat, d’vaint lai dyaire. È y fayait môtraie qu’ nôs étïns li po qu’ è les aittendeuche. Daivô ïn moétchou soûetchi d’ sai baigatte, l’ Djôsèt aipp’lé ci Léon, l’ diridjou di tch’mïn d’ fie des Combes que s’ râtait ènne boussèe.

Mains ç’ ât qu’ è fât pâre ïn biat. Bondjoué Léon, t’ peus m’ bèyie dous biats ?
Po allaie laivou ?
Dâs d’rie an ôyé l’ Aigathe : Dis-yi qu’ è n’ é p’ fâte d’ le saivoi !
Mains, Aigathe, i te n’ peus p’ bèyie ïn biat ch’ i n’ sais p’ laivoù qu’ te vais !
È bïn, bèye-me ïn biat po lai Sïnt-Fromont !

Les voili paitchis. L’ tchu-tchu çhoueçhait, étieupait tot aivâ lai Côte d’ Oye, l’ djubi aivait bïn pavou. En lai Combe Tabeillon, an viront d’ l’ âtre sen. È Yov’lie, an tchaindgeont d’ train po en pâre yun bïn pus grôs. Ci d’rie les aimoinné dôs l’ Mont Russ’lïn, chus l’ viaduc de Sïnt-Ochanne, pe djainqu’ en Aîdjoûe. È Poérreintru, encoé ïn tchaindg’ment, an pregnont lai Boy’vatte, ïn p’tét train c’ment ç’tu des Fraintches-Montaignes !

Aiprés tot çoli, les voili è Bonfô. D’vaint d’ allaie en lai mâsse, èls allainnent dire bondjoué en ç’te Léona. Ç’ ât lée qu’ les aivait envèllie. Ç’te Léona, c’ était ènne vendaire que v’niait dains mon v’laidge po vendre des tchâsses pe des tiulattes de fanne. Mains, ès n’ étïnt p’ v’ni qu’ tchie lai Léonta, è s’ fayait musaie en lai mâsse. C’ était bïn chur ïn chire que djâsait tot patois, les prayieres aich’bïn. È n’ y aivait p’ quèchtion d’ laitïn !

Aiprés lai mâsse, ès sont aivu nonnaie tchie lai Léonta : ènne nonne de chire, daivô des piaités pe encoé d’ âtres è r’bousse meuté ! È y en aivait prou po gayaie, sains rébiaie l’ étçhéyatte de caf’lat daivô ïn tçhissat d’ gnôle è pe ïn cote â nèz ! Bïnhèy’rou qu’ aiprés, è y aiveuche les vépres pe ènne prochèchion dains le v’laidge po ïn pô pâre l’ oûere. Les d’ries tchaints, dginiflècchions pe prayieres, les voili tchie lai Léona po les quaitres.

Lai neût tchoéyait tiand qu’ ès s’ musainnent â r’toé, è rèc’mencie è r’boué ç’ qu’ èls aivïnt fait l’ maitïn.

Po r’montaie lai Combe, encoé ïn bon varre â Buffèt, ran d’ tâ po se r’ tçhïntçhaie d’vaint de r’veni en l’ hôtâ ! Qué bèlle djoinnèe !