Publié : 25 juillet 2018

La roue

Lai rûe.

Jean-Marie Moine

Lai rûe.

Nôs dgens aivïnt dj’ vu des greumes qu’ rôlïnt aivâ lai côte, mains djemaîs ès n’aivïnt aivu le s’né d’en tirie paitchi. Es feunent tot ébâbis d’ voûere les Romains péssaie d’aivô yôs tchies chus les vies qu’ès creûyïnt â traivie di paiyis. L’ tchaipu n’aivait p’ prou d’ ses dous l’eûyes po beûyie, mains c’ment qu’è n’y aivait p’ de vie â long d’ tchie lu, è n’ siéjait è ran d’épreuvaie d’ faire ïn tchie.C’était bïn trop grôs. Poétchaint, qu’è s’ dié, ch’ i m’ poéyôs faire âtçhe po allaie tçh’ri mon bôs dains lai côte, çoli s’rait bïn pus soîe que d’ le poétchaie ch’ les épales. Dâli è se m’nujé ïn prou p’tét è étrèt tchairat è brais. Mains tiaind qu’è l’ tchairdgeait pe qu’è traivoichait de chrégue ïn roid ran, aidé le tchairat se r’vachait d’ lai sen d’aivâ ! El airait fayu en premie creûyie des vies, mains tiu ât-ç’ qu’ les v’lait faire ? Pe è rébié tot çoli. In maitïn, dous d’ ses l’afaints djuïnt drie l’hôtâ. Els aivïnt crouejie ènne panne en traivie chus ïn bout d’ greume. Es s’étïnt sietès yun de tchétçhe sen di moitan d’ lai panne pe s’ croûetchïnt en tchaintaint. Es le f’sïnt bïn soîe. L’ pus loidgie des dous s’était botè tot â bout d’ènne sen, l’ pus poijaint s’était sietè d’ l’âtre sen, ïn pô pus prés di greume. D’aivô sai pajaintou, ç’tu qu’était aimont f’sait è r’montaie l’âtre qu’ n’aivait ran qu’è s’édie ïn pô des pies. Mains, qu’ se dié l’ tchaipu, lai croûetche n’é ran qu’ènne aippûesse, pe lai panne peut çhainnaie aich’bïn d’ènne sen que d’ l’âtre. I crais qu’i sais mitnaint c’ment qu’i dais faire mon tchairat po allaie en traivie dains lai côte. El aissembié dous brancaids d’aivô des traivoiches en ïn bout chus l’quél è piaicé ènne échpèce de caîse. A moitan d’ lai caîse, è croujé d’aivô les brancaids, dous bôs poichies â bout d’ïn p’tchus. El entchessé dains ces p’tchus ïn échi qu’ poétchait ran qu’ènne rûe â moitan. C’était son premie tchairat è ènne rûe. E l’aipp’lé ènne boy’vatte, pe lai voyé tot comptant épreuvaie. C’était aijîe d’ lai moinnaie è veûd, meinme â traivie des crâs, pe d’ maint’ni l’ fond d’ lai caîse bïn è piait. Mains, ran qu’ d’ lai tchairdgie ïn pô, qué mâ qu’ èl aivait po qu’élle ne çhainneuche pe è drète vou è gâtche, po lai r’teni qu’èlle se ne r’vacheuche pe. C’ât tot décoéraidgie qu’è r’venié en l’hôtâ, en s’ musaint : ç’ n’ât p’ possibye, c’ment qu’è fât faire ? L’ temps péssé. Les afaints djuïnt c’ment des fôs d’aivô ç’te poûerie d’boyevatte. Es l’aivïnt r’vachèe d’ lai croûeye sen, pe s’aimusïnt è faire è virie lai rûe. C’était en tchétçhun son toué. Les pus p’téts se f’sïnt bïn chur aidé rembâllaie poi les pus grôs boûebats que v’lïnt aidé tot c’maindaie. L’ tchaipu s’engraingniait, è yôs breûyait : « Rote de tchairvôtes de gosses, ch’vôs se n’ moinnèz’ p’ pyiains, i veus rontre ç’te rûe ! ». Di temps d’ dous trâs djoués çoli s’ péssait meu, pe tot était è rèc’mencie. In bé djoué, l’ tchaipu voyé dous grantes baîchattes qu’ s’aimusïnt d’aivô ïn afnat. Elles aivïnt aiccretchie ïn véye sait entre dous braintches, è pô prés â moitan. L’afaint était coutchie dains l’ sait. Les baîchattes le poétchïnt poi les bouts des doues braintches, yènne devaint, l’âtre en drie. Voili ç’ qu’è m’ fât po mai boy’vatte, qu’è breûyé en f’saint des lains d’ lai sen d’ sai r’mije. I n’aî ran qu’è botaie lai rûe en lai piaice d’ lai baîchatte de d’vaint. Son pus p’tét l’afaint s’aimusait d’aivô lai rûe tiaind qu’son pére airrivé. E s’ât botè è pûeraie tiaind qu’le tchaipu yi r’pregné lai boyevatte. Le pére le pregné dains ses brais pe yi dié : « Mon fé, mon p’tét Dédé, n’ pûere pe. T’ veus voûere, i t’ veus faire âtçhe qu’ te veus aivoi encoé bïn pus d’ piaîji. ». L’ boûebat n’ tçhitait p’ son pére, è n’ airrâtait p’ d’yi d’maindè çoci, pe çoli, d’yi posaie mile quèchtions. D’aivô ses l’utis, l’ tchaipu aivait tirie feûs des pieces d’ sai premiere boy’vatte, lai caîse pe l’échi d’aivô lai rûe. E tchaipujé dous prou grants londg’rons qu’è poiché en ïn bout po poéyait y entchessie l’échi. El encranné dous traivoiches è pô prés â moitan des londg’rons, po poéyait piaicie d’tchus lai caîse. E copé d’ lai boinne meûjure les dous bôs d’lai premiere boy’vatte que t’nyïnt l’échi, è les r’tchaipujé en éparons qu’è piaicé en drie d’lai caîse c’ment aippuesses po qu’lai boy’vatte feuche bïn è piait tiaind qu’è lai tchairdg’rait. Dous djoués d’aiprés, lai boyevatte était prâte, èl était chur d’ son aiffaire. Le p’tét Dédé yi dié : « Mains papa, ç’ât quasi lai meinme boyevatte que ç’té qu’ t’ aivôs fait en premie. ». « Aye, qu’yi dié l’ pére, mains lai premiere n’allait p’ daidroit. C’té-ci âdré bïn meu. Te n’ crais p’ ? E bïn graipoinne dains lai caîse. ». Les voili paitchis, l’ pére boussaint lai boy’vatte. Es péssïnt bïn soîe tot poitchot, aich’bïn è piait chus l’ tchaimpois, drèt aivâ obïn aimont les crâtats, que d’ traivie dains lai côte. Des côps, l’échi coinnait è tchétçhe toué. L’afaint riait de tot son tiûere en ravoétaint son pére. Els étïnt laivi di v’laidge tiaind qu’ le tchaipu s’airrâté po réçhoûeçhaie. L’ Dédé déchendé d’ lai caîse pe épreuvé d’boussaie lai boy’vatte. C’était bïn trop pâjaint po lu. L’ pére lai r’viré. Son fé s’ poéyait encoé aimusaie d’aivô lai rûe. C’te drôle de béte yi bèyait dous piaîjis : faire è virie lai rûe obïn s’faire è vand’laie tot poitchot ! D’vaint de r’paitchi, l’ tchaipu rempiâché lai caîse de trontchats pe sieté l’ Dédé poi d’tchus. Els s’airrâtainnent encoé po raiméssaie des biassons pe des beûtchïns qu’ l’afaint dévoûeré taint èl aivait faim. Tiaind qu’èls airrivainnent d’vaint yote hôtâ, lai fanne di tchaipu rité po les r’cidre pe po les embraissie. Dains les brais d’ sai mére, l’ Dédé dié : « Tiaind qu’i s’ré grôs, i vôs veus moinnaie vand’laie, toi pe l’pére, en boy’vatte. ». Tus soriainnent, sains ran dire, taint èls étïnt hèy’rous. Bïn des annèes d’aiprés, l’ Dédé était aidé fie d’ son pére tiaind qu’ è l’ôyait, en lai lôvrèe, ècmencie sai raiconte : « Po l’ premie côp d’ mai vie, i aivôs vu l’ tchairat des Romains, tiaind qu’… ». J-M. Moine