Publié : 25 juin 2018

Lai Dyènainat’tyètye

Jean-Marie Moine

Lai Dyènainat’tyètye

Les véyes aivïnt raicontè c’ment qu’ des dgens qu’ vétçhïnt aivâ, tot prés d’ lai r’viere étïnt paitchis ïn pô pus hât dains lai côte, è câse des ennâvaidges qu’ détrujïnt aidé tot. Dâli, ès vétçhïnt dains ïn p’tèt l’ haimé, en mé lai côte, dâs craibïn pus d’ ïn mill’nâ. È n’ y aivait ran qu’ quéques p’téts bacus po les dgens pe po les bétes, â moitan d’in éssapeut, â long d’ïn p’tét reûché qu’ yô aippoétchait d’ lai boinne âve. Ènne neût (è y aivait d’ çoli ènne vintainne d’ annèes) lai montaigne était tchoé aivâ dains ïn terribye traiyïn. Poi tchaince, l’ aivaleu n’ était p’ v’ni djainqu és bacus, mains èl aivait r’tçhevie ènne grôsse paitchie d’ l’ éssapeut. Taint bïn qu’ mâ, d’aivô brâment d’ coéraidge, ès s’ étïnt r’botès â traivaiye, èls aivïnt boy’vattè des moncés d’ roétches è pe d’tiere d’vaint d’ poéyait r’vengnie. Mains voili qu’ aiprés quéques s’nainnes, lai dou s’ était tairi ! Lai crovèe d’ l’ âve était v’ni éroéynainne. Les hannes daivïnt moinnaie tchétçhe djoué les bétes djainqu’ en lai r’viere po les faire è boire, pe raippoétchaie des pâjaints sayats d’ âve qu’ èls aivïnt fâte po yôs. Èls aivïnt bïn épreuvè d’ creûyie ïn échpèche d’ étaing tot prés des bacus, mains è n’ pieuvait p’ prou po l’ rempiâtre. Les dgens, chutôt les djûenes s’ étïnt sôlés â traivaiye, ès s’ n’ étïnt p’ poéyu aivéjie. Les pus véyes étïnt moûes, les pus djûenes étïnt tus paitchis d’ aivô quéques bétes po épreuvaie d’ s’ allaie étabyi âtre paît. L’ Dyéne, lu, n’ aivait dj’mais v’lu tçhittie ci câre de tiere. È diait aidé : i seus tchoé â monde ci, chus ç’te tierre d’ nôs véyes dgens, ç ‘ât ci qu’i dais vétçhie è pe meuri. D’aivô sai fanne, èl aigongé de d’moéraie chus ci câre de tiere d’ yôs ancétres. Ès n’ aivïnt pus ran qu’ doûes vaitches qu’ yôs bèyïnt di laicé, qu’ dous poûes qu’ yôs feunéchïnt ïn po d’ tchie. Èls aivïnt âchi quéques lédyumes â tieutchi, pe quéques dg’rainnes è quéques laipïns, pe c’était tot. Èls aivïnt prou d’ âve po les dous, d’aivô lai pieudge qu’ ennâvait l’ moitan di p’tét l’ étaing. Mains sai fanne âchi aivait meuri, dâli mitnaint, è d’moérait tot d’ pai lu. Ïn bé djoué, è paitché bïn laivi d’ aivô son soûeta dains lai montaigne. En bïn des yûes, èl aivait aivu di mâ d’péssaie. È câse des roétchies obïn tiaind qu’ le bôs était épâs, èl aivait daivu faire d’ grôs détoués. Tot d’ ïn côp, è tchoyé chus ènne dou qu’ l’ âve était bïn çhaîre. Ç’ ât craibïn l’ âve d’ note reûché qu’ l’ aivaleut é dépiaicie tiaind qu’ lai montaigne ât tchoé. Son saing n’ fsé qu’ ïn toué. Ch’ i veus sâvaie lai vétçhaince chus ci câre de tiere, è fât dépiaicie l’ haimé, obïn creuyie ïn raigat po aimoinnaie l’ âve djainqu’ en note étaing. È y’ sannait qu’ lai dou était en aimont d’ l’ haimé. Lai neût poétche consaye qu’‘ è s’ dié. En r’veniaint vés son bacu, è n’ rébié p’ de piaintaie des pâs totes les vinte pésses en déchendaint tot bal’ment. Qué croûeye de neût èl é péssè. Qu ‘ ât-ç’ qu’ ètait l’ pus soîe ? Mains c’ était tot d’ meinme mâ fait d’ aibaindnaie l’ haimé, chutot qu’ èl aivait vengnie di soile â bontemps ! Pe ç’ n’ était p’ vés ç’te dou qu’ ses ancétres aivïnt mâj’nè les bacus ! Â cheuyaint maitïn, sai déchijion feut prije. È r’venié vés lai dou, en poétchaint ch’ ses épales ènne pâle, ïn creu pe ènne haitchatte. D’ aivô coéraidge, èl ècmencé d’ éssapaie ïn péssou pe d’ creûyie l’ raiga en cheuyaint les pâs. L’ détouénè reûché nenttayait l’ bout qu’était dj’ fait, pe aimoéhléchait lai tierre en aivâ. L’ âve s’ aippretchait tos les djoués ïn pô pus d’ l’ haimé. È poyé meinme creûyie des p’téts bouts d’ tèrrâ en aippiaiyaint ènne vaitche en ïn échpèche de véye ritte. Poi ïn bé maitïn, è n’ demoérait pus qu’ quéques métres è creûy’naie djainqu’ en l’ étaing. È s’ était y’vè en lai pitçhatte di djoué, pe s’ était boté è pieutchie, è pâlaie, è r’vâlaie. Èl aivait tiute de voûere l’ âve rempiâtre l’ étaing, â long di bacu. Vés les dieche, è maindgeait ïn moéché d’ pain moéyie dains ènne étçhéyatte de laicé, tiaind qu’ è voyé s’ aippretchie dous djûenes dgens, ènne baîchatte pe ïn tot djûene hanne… qu’ aittieuyïnt quaitre tchievres pe dous cabris. Mon Dûe s’ dié-t’-é, po chur qu’ i seus fô. È n’ aivait pus niun vu dâs l’ djoué d’ lai moûe d’ sai poûere fanne, è y aivait craibïn trâs l’ ans. Bondjoué qu’ dié lai baîchatte, i seus ç’t’ Ainatte pe lu, ç’ ât ci Tiètyïn, ç’ ât mon aimoéreu. L’ d’rie mois, nôs pairents sont moûes des bossattes. D’vaint d’ meuri, ès nôs aint djâsè d’ ïn Dyéne pe d’ âtres dgens qu’ vétçhïnt dains ïn l’ haimé, è mé côte dains lai montaigne. Ès nôs aint fait è promâttre de r’v’ni ci, chus ç’te bnâchu tiere d’ nôs ancétres, laivi des malhèyes d’ lai pèchte. Ât-ç’ qu’ vôs n’ srïns p’ ci Dyéne ? Bïn chur qu’ i seus l’ Dyéne, qu’ è réponjé tot tiaimu, mains c’ment qu’ s’ aipp’lait ton pére ? Mon pére dié l’ Ainatte, c’était ci Dgeoûrdges des grôs l’ Aînes. Ci poûere Dgeoûerdges, dié-t-é en pûeraint ! Lai baîchatte saivait tot mitnaint. Èlle se tchaimpé dains les brais di Dyéne en l’embraissaint pe en y’ diaint : grant-pére ! Sôt’ni poi l’ brais d’ sai p’téte-féye, l’ véyaid emmoinné les dous djûenes vés l’ reûché laivoù qu’ è pujé ènne étçhéyatte d’ âve, pe r’venié ïn pô aivâ des bacus, â pie d’ ènne crou, chus lai fôsse d’ lai Tçhait’rine, lai grant-mére d’ l’ Ainatte. È prayé Dûe, b’nâché l’ âve, en tchaimpé ch’ lai fôsse pe saingné les djointes mains des dous djûenes en yôs diaint : Â nom de Dûe, i vôs b’nâs. Mitnaint vôs étes mairiès, vôs vétçhrés dains ci l’ haimé, pe vôs airèz brâment d’ afaints. Djainqu’ â meûcie di s’raye, l’ Dyéne r’viré pus d’ cent côps di bacu en l’étaing, di reûché â bacu. Tot l’ djoué, èl aivait ravoétie l’ Ainatte qu’ botait l’ bacu en oûedre di temps qu’ le Tiètyïn r’vâlait lai fïn di reûché djainqu’ en l’ étaing, d’ vaint d’ faire bé és bétes. L’ soi, l’ âve rempiâchait tot bal’ment l’ étaing. Lai tâle aivait trovè ènne oûere de féte d’aivô des ptéts boquats d’ cramias. Aiprès d’ grantes l’ annèes, lai boinne è tchâde sope r’ femait dains ènne étçhéye pe dains les trâs aissietes. An djâsont d’ ci temps qu’ aivait péssè dâs lai tchoite d’ lai montaigne, tiaind qu’ ne l’Ainatte ne l’ Tiètyïns n’ étïnt encoé tchoés â monde. D’vaint d’ s’ allaie coutchie, l’ grant-pére pe les djûenes dgens s’ tniaint poi lai main, s’ aidg’nonyainnent â long di nové reûché. En engoulaint de ç’te b’nâchu l’ âve ès diainnent ensoinne : Adjed’heû nôs t’ baptèyans. Te t’ aippel’rés lai Dyènainat’tiètye ! J-M. Moine