Publié : 25 juin 2018

La bielle

Lai dèm’nâle

Jean-Marie Moine

Lai dèm’nâle

Nôs ains vu dains ènne âtre hichtoire, c’ment qu’ ci Djeain était dev’ni r’môlou aiprés qu’ èl euche ïnventè lai coérbatte. En l’ ècmenç’ment, èl allait d’ aivô sai Yâdine pe tot son airtifâye, d’ ïn yûe en ïn âtre po r’bèyie l’ fie. Mains mitnaint qu’ èl aivait des afaints, sai fanne n’ le poéyait pus aidé cheûdre po virie lai coérbatte. Èl épreuvé d’ virie lai coérbatte d’aivô ènne main, pe péssait l’ uti ch’ lai ribe d’ aivô l’ âtre main. Mains dïnche, è n’ fsait ran qu’ di traivaiye de poûe. L’ uti dainsait ch’ lai ribe è drète, è gâtche, è le n’ poéyait p’ maîtraiyie. Èl aivait épreuvè âchi d’ virie lai coérbatte d’ aivô le dg’nonye obïn d’ aivô l’ pie, mains c’était encoé pé. Ch’ è d’moérait drassie, lai coérbatte l’ tchaiyeutait d’ ènne sen d’ ènne âtre, c’ment ïn bloûetchie qu’ an airait choûelè. En s’ sietaint, è s’ daivait écabreleutchie qu’ èl en predjait son aipiomb. Ïn côp, èl était meinme tchoé aivâ d’ sai sèlle, qu’ è s’ était bïn fait mâ ! L’ pus grôs d’ ses afaints airait bïn v’lu allaie d’ aivô son pére po virie lai coérbatte. Mains èl était trop p’tét, è n’ aivait ran qu’ cïntçhe ans. È srait aivu sôle quasi d’vaint d’ aivoi ècmencie l’ traivaiye. Pe, c’ était daindg’rou. Ïn djoué qu’ è s’ aimusait d’ aivô lai ribe, lai coérbatte y’ aivait rontu doûes dents. Le r’môlaidge yi bèyait bïn di traivaiye, les dgens di câre de tiere en aivïnt fâte. Paifois son bâ-pére l’ aiccompaignait po allaie r’môlaie. Ès s’ poéyïnt tchaindgie l’ traivaiye, yun viraint lai coérbatte, l’ âtre péssaint l’ uti ch’ lai ribe. Mains l’ pus s’vent, ç’ ât tot d’ pai lu qu’ è daivait raiffilaie les utis en les riffaint chus ènne piaite piere. C’ était bïn pus du qu’ d’ aivô lai ribe, pe chutôt, l’ traivaiye n’ était p’ che bïn fait, p’ èl aivait moins d’ aivaince. N’ t’ en fais p’, qu’ yi diait sai Yâdine en l’ embraissaint, dains quéques l’ annèes, tai p’téte airaingne t’ veut poéyait r’cheûdre po virie lai coérbatte ! Ïn bé djoué, è voyé son boûebat, ci Dyène, qu’ s’ aimusait è s’ pendre aiprés lai coérbatte. Lai pâjainne ribe en viraint d’ ènne sen tirait l’ boûebat vés le hât. Aiprés, tiaind qu’ lai ribe virait dains l’ âtre sen, l’ suchpendu boûebat déchendait. Pe, d’ aivô son émeû, lai ribe r’ tirait l’ afaint vés le hât. Dïnche aidon djainqu’ lai ribe n’ aiveuche pus d’ ébrûe ! Piein de s’né, l’ Djeain s’ dié : i crais bïn qu’ i aî trovè c’ment qu’è fât faire po poéyait faire è virie lai coérbatte d’ aivô l’ pie, pe qu’ ses mains feuchïnt loques po t’ni l’ uti ch’ lai ribe. Èl aittaitché yun des bouts d’ ènne coûedge â maindge d’ lai coérbatte, pe l’ âtre âtoué d’ son soulaîe. C’ était dj’ ïn premie l’ aitieu. Mains tiaind qu’ lai coûedge s’ envôjait âtoué di maindge, è daivait tot râtaie po lai r’dévudie. Sai fanne, lai Yâdine yi dié : en lai piaice d’ lai coûedge, è fârait poéyait botaie âtçhe de du que s’ n’ envôjeuche pe âtoué di maindge. Ah ! Mai fanne, t’ és ènne boinne aivisâle. Chi, è n’ fât p’ faire c’ment l’ airaingne qu’ envôje son flè ! È poiché ïn prou grôs p’tchus en yun des bouts d’ ènne yichte po l’ enf’laie dains l’ maindge d’ lai coérbatte, pe ïn p’tét p’tchus en l’ âtre échtrémitè, laivoù qu’ è péssé ïn échpèche d’ étrie fait en coûedge. Mitnaint, è poyé r’ môlaie tot d’ pai lu, sains niun d’ âtre po faire è virie lai ribe. È y’ aivait tot d’ meinme encoé âtçhe qu’ n’ était p’ défïnmeu. È sôlait brâment è câse d’ l’ ébaitt’ment d’ son pie. Papa, breûyé l’ Dyène, ravoéte note tchait qu’ voérait aittraippaie ïn cra dains l’ aîbre. Mains tiaind qu’ le tchait s’ aippretchait di cra, l’ oûejé voulait en breûyaint chus ènne âtre braintche. Aigrïmpè, l’ noi l’ oûejé montait, déchendait, pe r’montait, r’déchendait,…, ïn pô c’ment son pie dains l’ étrie, mains èl était dyidie poi lai braintche. Voili ç’ qu’ è m’ fât qu’ breûyé l’ Djeain. Èl aittaitché ïn lavounat â béche d’ lai yichte. È n’ aivait pus qu’ è preussie chus l’ lavounat d’ aivô son pie qu’ dains son émeûsse de vait-è-vïnt entrïnnait l’ virat d’ lai ribe. Note Djeain v’niait d’ ïnventaie l’ compyiquè mécânichme : rûe – dèm’nâle – frâte. J-M. Moine