Publié : 25 juillet 2018

Grand-mère vue par un enfant

Grant-mére vu poi ïn afaint

Agnès Robert

Grant-mére vu poi ïn afaint

poi Agnès Robert Ènne grant-mére, ç’ ât ènne fanne qu’ n’ é p’ d’ afaint ; ç’ ât po çoli qu’ èlle ainme les afaints des âtres. Les grant-méres n’ aint ran è faire, èlles n’ aint ran qu’ d’ étre li. Tiaind qu’ èlles nôs emmoinnant prom’naie, èlles mairtchant tot bal’ment â long des bèlles feuyes è pe des tch’néyes. Èlles ne diant dj’mais : « Aivaince pus vite, dépâdge-te ! » En dgén’râ èlles sont grôsses, mains pe trop, po poyait aittaitchie nôs soulaîes. Èlles saint bïn qu’ an ont toûedje fâte d’ ïn doujieme moéché d’ toétché obïn di pus grôs. Ènne vrâ grant-mére n’ fie dj’mais ïn afaint, èlle se bote en roingne en riaint. Les grant-méres poétchant des breliçhes, pe des côps, èlles poéyant meinme rôtaie yôs dents. Èlles saint étre souédges tiaind qu’ è fât, po nôs n’ pe dgeinnaie tiaind qu’ nôs sons mâlaidraits. Tiaind qu’ èlles nôs yéjant ènne hichtoire, èlles n’ en sâtant dj’mais ïn bout, pe èlles n’aint ran contre, tiaind qu’ an yi r’demainde lai meinme hichtoire dous, trâs côps. D’ tot les maivures dgens, è n’ y é ran qu’ les grant-méres qu’ aint aidé di temps. Èlles saint faire le dgèste qu’ fait di bïn tiaind qu’ an ont mâ. Les grant-méres ne sont p’ che çhailattes qu’ èlles le diant, meinme ch’ èlles meurant pus s’vent qu’ nôs. Tot l’ monde dairait épreuvaie d’ aivoi ènne grant-mére, chutot ces qu’ n’ aint p’ lai télé. Ènne grant-mére, çoli sie aito de d’moéraie ïn afaint tiaind qu’ an ât grant.