Djasans

{ Paru dans l’Ajoie, 170204}

Dreumi d’dôs lai yaice

Tiu ât-ce que n’é pe conchtrut dés cabânes aivô l’envie d’y péssaie lai neût ? Lés afaints, mains achi lés aiduy’tes aint tus aivu, ïn côp o l’âtre, envie de dreumi, ènne neût, feûs d’l’hôtâ, dains dés yûes tchairdgis de michtére. Paitchant de l’aivijaîye qu’è fât eûffri és visitous âtçhe de nové, de chïndiulie, an nôs propoje mitnaint de péssaie ènne neût dains les aibres, dains dés soûetches de mâjnattes voù an airrive poi ènne étchiele. Po cés qu’ainmant lés bacus, ès poyant aimodiaie ènne rôlatte, ènne véye prijon, ïn foue-tchété o ènne nèe que prend l’âve â long d’lai rivatte… Chur que nôs n’ains pe encoé tot vu ! Nôs v’nians de péssaie dous s’nainnes voù lai tchâlou ât aivu bïn raîe. Moins cïntçhe, moins dieche degrés, lo djoué c’ment lai neût. Çoli fait l’piaiji de dgens qu’aint en téte de vivre c’ment lés Eskimos èt de n’aivoi po mâjon qu’ïn aivri conchtru dains lai yaice. Nôs ains tus vu, tchu lés feûyes, o dains ïn laivimaidge (télévision), de cés igloos faibritçhès aivô dés moncés de noi qu’an botte lés yuns tchu lés âtres. Lés tchessous de Laponie yi péssant lai neût, tchu dés pés de bétes. È y é meime dés dgens, lés Inuits, que vétçhant quasi aidé dains cés majons de yaice. È n’en fât pe d’aivaintaidge po que, dains nôs montaignes, dés âbèrdgichtes musant de s’faire dés sous en faibritçhaint de cés mâjons de yaice. Ès lés aimodiant és visitous que sont en lai r’tchiertche de novèlles seinchâchions ! Dains dés v’laidges d’envellie, c’ment Zermatt, Gstaad o bïn Davos, an en peut trovaie tot l’huvie. Cés que lés conchtrusant ne sont pe raivoétaints tchu lai dépeinse. Ès utilijant dés gros l’endgïns po traivaiyie lai noi. Ès lés faint décoûeraie poi dés artichtes. Dali ç’tu qu’y vïnt péssaie ènne neût dait bïn s’vent débochie dés ceintainnes de fraincs. Tot d’meinme, po l’prix an yi eûffre ïn tchavé de Fendant èt ènne boènne fonjûe ! È fât saivoi ç’qu’an veut ! I aî trovè, tchu l’internet, dés eûffres que m’faint sondgie qu’lo monde ât aidé pu fô. Po dous dgens, çoli peut côtaie dous mil fraincs lai neût... lés djoués de s’nainne... Bïn chûr, lo saim’di èt l’dûemoine, è fât comptaie ïn pô pu ! Lo tot, ç’ât de trovaie dés beujons que sont d’aiccoûe de s’faire aivoi. Craites-me bïn, è y en é ! Ès v’niant de tos lés cares de not’véye bôle, po péssaie ènne neût dains ïn igloo. I èchpére bïn que yôs neûts sont rempiachus de douçou èt de r’mantichme. Dâli i en seus chur... ç’ât graiyenè tchu lés r’tieuyes de totes cés eûffres ! L’micou