Publié : 19 décembre 2016

Bonfol, terre de potiers

Bonfô, tiere de poties.

l’micou, Michel Cerf

Bonfô, tiere de poties.

{{« Montaie dains lai Boyevatte po Bonfô tot â fond, ç’ât lai tiere dés potats, dés étçhéyes, dés câquelons… »}} Chur qu’è vôs en s’vïnt, de lai tchainson de Léon Vultier : « I tchainte lo paiyis dés Aîdjôlats ». Dali qu’ât-ce qu’è yi d’moére âdj’d’heû de tot lo saivoi-faire èt d’lai bèlle bésaingne dés câqu’lounies di véye temps ? Dés poties, è n’y en aivait’pe ran qu’è Bonfô, mains, ç’ât aleintoé d’ci v’laidge qu’an poyait trovaie lai moiyou arbûe (argile), ç’té que n’aivait’pe trop de p’tès caiyôs po faire éçhafaie lés potats di temps d’lai tçheûchon. Potie, ç’ât yun dés pu véyes méties aivô ç’tu de paiyisain. L’hichtoire dés poties de Bonfô n’ât’pe encoé aivu graiyenèe. En raivoétaint lés r’cens’ments dés dgens, aleintoé de 1800, an voit qu’è y aivait 26 poties è Bonfô po ïn v’laidge de 159 ménaidges. Cïnquante annèes pus tôt, an trove ènne piaînte dés poties que gronç’nant que lés aipprentis sont mâ frômès… Mains po trovaie lai traice d’ïn ait’lie que pregnait lés djûenes po lés frômaie, è fât aittendre djainqu’en 1901. Poétchaint lés aîg’ments faibritçhès è Bonfô étïnt coégnus èt prijies tot paitchot. En lai grante foére de 1857 (Exposition nationale), an poyait aidmiraie lai prôduchion dés poties de Bonfô, mains achi de Tchairmoiye, Cornô èt Daimvant. Dés craimpèts allïnt de v’laide en v’laige, aivô des tchairats rempiachus de potats, de câquelons èt de totes soûetches d’aîg’ments. È s’y en trovait achi tchu lés foéres èt dains lés maigaisïns. Mains, â c’qu’an peut yére, lés dgens n’étïnt’pe rètches, dâ qu’ès oeûvrïnt d’lai pitçhatte di djoué djainqu’en lai roûeneu. Ȃ siecle péssè, pu d’ènne faibrique sont aivu conchtrutes. En 1903, ènne tierliere (tuilerie) èt, pu taid, ènne faibrique de carr’laidge aint vu l’djoué. Mainque de tchaince, lai permiere ât aivu conchumèe poi l’fûe aipré saze annèes. Lo d’rie potie de Bonfô feut Armand Bachoffner. Djainqu’en lai fïn de sai vie, èl é prôdu dés pieces d’ènne grante valou, décoûrèes de bèlles tieulès. En herbâ, an poyait voûere sés oeûvres â d’dains meinme de son ait’lie, môtrèes aivô dés pieces d’âtres poties, qu’èl aivait l’piaîji d’ïnvitaie. Ç’te bèlle ïnduchtrie è fait de Bonfô ïn dés pus entrepâraints v’laidges d’Aîdjoûe. È fât r’coégnâtre qu’aivô lés novés moiyïns de prôduchion èt l’épuj’ment dés réserves d’arbûe, lai concurreince n’était pu possibye. Lai bèlle aiveinture dés câqu’lounies se peut décreuvi, âdj’d’heû dains ïn ïntèrèchaint musèe, euvie dous dûemoinnes pai mois, è Bonfô. Èt, po lés grietous d’lai pot’rie, ès poyant faire ènne visite dains lai boutitçhe de Felicitas Holzgang, que feut lai d’riere aippprentie d’Armand Bachoffner. Dains son ait’lie, èlle faibrique, de sés mains, totes soûetches de bèlles tchôses, dains l’rèchpèt d’lai bésaingne dés véyes poties de Bonfô. L’micou Légende de la photo : Lai bïn coégnu Caf’tiere de Bonfô, réayijèe poi Armand Bachoffner, po ïn côp en tieulèe, aidonc que totes lés âtres étïnt nois.