Publié : 2 décembre 2015

Automne d’Ajoie

Herbâ d’Aidjoûe.

L’micou, Michel Cerf

Paru dans l’Ajoie du 14 novembre 2015

Herbâ d’Aidjoûe.

Da bïn dés s’naines lés aillombrattes ne faint pu de pichas de poue dains lo cie d’Aidjoûe. Dains lés tchaimps, aivô lai fritçhaisse eur’venue, paîturant moins d’airâs d’bétes, mains, po not’ dépiaiji, de peûtes biantches rondes balles lés aint rempiacies. Lés paiyisains, aivô yôs tirous aidé pu foûes èt yôs courieûs engïns, aint raiméssè c’qu’è yi d’moérait de voiyïn èt aint vangnie l’biè po lai séjon è v’ni. Mit’naint qu’nôs heurleudges sont réyies tchu l’houre d’huvie, l’herbâ ât bïn inchtallè dains nos fïns èt nos tieutchis. An peut chiouçhaie ïn po èt voûere veni. Lés pus aivisès réyant yôt’ bésaingne tchu l’temps qu’è fait. És r’botant ïn po d’oûedre âtoué d’l’hôta, étçhissant yos aigrecôles machines aivaint d’lés r’migie po lai croûeyie séjon. È s’y en trove aidé yun o l’âtre po allaie ès moûechierons. Lés boénnes annèes, è fât s’occupaie dés pammes, faire di citre èt moinnaie è beûyie lés véchés de ç’liejes o de damès. Chutôt, è fât bïn aiyûere lés grais poues, lés botchayie d’aidroit, po qu’an euche lai moyou tchie è euffie ès envèllies en lai Sïnt-Maitchïn. Lai Sïnt-Maitchïn, nôs yi sons ! Chi djainque-ci i ai putôt djasaie po les dgens d’lai tiere, lés eurtroves de la Sïnt-Maitchïn aivô cés r’pés que n’en finichant pu, sont po tot l’monde lai caje de r’voûere lai faimille èt les aimis po paitaidgie dés envèllies qu’an ne sairait rébiaie. Che çte côtume ât aidé aivu l’aiffaire des Aidjolats, èlle fait brâment d’envious ès quat’ cares di paiyis. An peut mit’naint maindgie lo r’pés de lai Sïnt-Maitchïn ach’bïn dains l’Vâ qu’en lai Montaigne. Les dgens que pregnant piaiji è s’empâfraie de tote çte tchie de poûe arrivant de tot pitchout. Poérreintru n’ât’pe en r’taid po lai féte : ïn mairtchie s’y tïnt tçhétçhe annèe et lés mâj’nattes sont réservèes grant en l’aivaince. En en f’saint l’toé, an peut faire sés aitchaits bïn soîe : andoéyes, satchie laid, grulatte, tchaimbon, mains achi totes soûetches de gniôles, âve de ç’lijes o damè, beûtchïns o biassons. An trove encoé dés confretures èt dés breuvaidges aipparayies po tirie dous tras sous ès tourichtes. An s’peut bïn chur réchâvaie l’gairguesson aivô di bian o di roud’ge vïn, c’ment di tchâd vïn o de lai tchâde biere, meinme che lai tchâde biere n’é’pe brâment è faire aivô nos côtumes… Lés Aidjolats ne sont’pe dés dgens rençhoues èt yôs poûetches demoérant aidé eûvies. Poétchaint cés que v’niant dés âtres caintons po vendre dés prodûts que ne sont’pe de tchie nôs, dés dichtilès, d’lai tchie o bïn dés haillons, f’rïnt meu de d’moéraie en l’hôta. I vôs l’dis fraintch’ment, ç’ât cés dgens-li que faint que p’tèt è p’tèt not’ féte veut piedre sai chïndyularitè, sai tchalou èt son aidjolate tieulèe. L’micou