Publié : 30 novembre 2015

Garder sa langue

Voidgeaie sai laindye .

L’micou, Michel Cerf

Paru dans l’Ajoie du 6 décembre 2014

Voidgeaie sai laindye .

I ne m’engraingne pe bïn s’vent. Mains dâli, è y é dés cops qu’è fât l’chie sés aigruns paitchi, tiaind ès vôs étôffant l’tiûere. È y é aidé aivu dés gredïns qu’aint aibaindnè l’frainçais po l’rempiaicie poi dés étraîndges laindyes, dés laindyes que n’aient ran è fotre tchie nôs. È n’y é’pe chi grant, è Coerdgenaie, tchu l’mûe d’ènne faibrique de tchâsses, an poyait yére, en allemoûess : « Strumpfwarenfabrik »… Dïnche ènne peute réclame ne poyait que moinnaie lai mâjon en tripètte. Ç’ât c’que ç’ât produ ! Ïn po paitcho, an trove dés pubyicitès en aindyais, o bïn dès croueyes aîneries tchu cés paipias qu’ès aippelant « flyers ». I coégnas ïn djûene Aidjolat qu’é aivu son « bachelor » è Neûtchété èt pe qu’ât paitchi faire ïn « master »en « e-marketing ». C’ment qu’è n’ât’pe bïn rétche, è bosse dains ïn « snack » , ïn d’cés « fastfood » laivoù lés dgens v’niant, aivô yos dyimbardes en « leasing », aitch’taie cés breuyries à baintchâ d’ïn « drive ». Lo soi, ci djûene qu’è ïn djoénâ « e-paper » yét lés « news » tchu son oûerdnatou en chlapant ïn coca « light » aitch’tè dains ïn « shop » en aivâ d’lai gasse. Vôs saîtes c’que m’engraingne lo pu, ç’ât l’nové nom dés Forces Motrices Bernoises. Dje qu’è n’y é’pe aivu moiyïn d’paitaidgie les FMB tiaind l’nové cainton é vu l’djoé, voili qu’ès aint rempiaicie FMB pai BKW. Qué voirgangne, dains ïn cainton que djase frainçais ! Ès aint boté cés trâs lattres tchu ènne grôsse boûene , en bodjure d’lai vie, ïn po c’ment ci baiyi Gessler, â temps dés permies Chuisses aivait boté son tchaipé tchu ènne piertche po qu’lés dgens l’saluïnt en péssaint ! È y é pu d’ènne année que cés trâs lattres me faint drassie l’poi ch’lai téte tiaind i pais feu d’mon hôta. Nos ains coignu dés annèes voù lés djûenes n’airrïmpent léchie bïn grant ci « tchaipé de Gessler » quâji tchu lai vie… Mains voili, mitnaint lés combaits s’faint d’vaint ènne f’nétre d’oûerdnatou aivô ènne raite o bïn ïn « joystick » ! L’micou