Vous êtes ici : Accueil > Contes, nouvelles, chansons, presse, radio, films, pages d’histoire > Messes des patoisants et prières > Messe du 30e anniversaire de l’amicale des patoisants, 12 octobre (...)
Publié : 4 septembre 2015

Messe du 30e anniversaire de l’amicale des patoisants, 12 octobre 2014

A l’occasion du 30e anniversaire de l’amicale des patoisants, une messe suivi d’un repas était organisé ce dimanche 12 octobre 2014, au centre hippique du Mont-de-Coeuve. La messe était teinté d’humour et de chants traditionnels en patois. Merci à {{Actu Ajoie}} qui vous propose quelques extraits ! {cliquez sur} http://www.ajoie.net/index.php/forum/news/100-actu-ajoie-la-messe-en-patois#366 Mâsse aivô lés patoisaints d’Aidjoûe é di Çhiô di Doubs – Mont d’Tieûve po lés 30 ans d’lai Socïetaie ât praîye de caivaiyerie – 12 d’octôbre 2014 - 10 h. 28ïeme dûemoènne A

Ecouter le sermon

Le texte du sermon du chanoine Oeuvray

    Més boènnes dgens, tiaind qu’y vait en ènne nace, é çoli m’airrive bïn svent d’célébraie ïn mairiaidge, i r’coéniât tot content lés ïnvitès : è poétchant tus ïn seingne po lés déssavraie. Ènne çhioé en lai bot’nïere ou bïn tchu lés motretius dés djûnes fannes, ïn roudge boton ou bïn encoè ïn bian riban nouquaie en lai bot’niere é encoè és dyïnbardes. C’était-de’je dïnche di temps d’Jésus : è y aivaie ènne véture de nace. Adjd’heû, Djésus nos ïnvite és naces de Dûe aivo lés hannes. Le recègnon de naces ât prâ, lai tâle ât prâte é ç’ât Dûe lu-mainme qu’ïnvite. Nos sont bïnayerous d’étre dïnche ïnvitès po fétaie cés 30 annaies d’lai Socïetaie dés patoisaints d’Aidjoûe é di çhiôs di Doubs. Voili ènne bèlle maîrtche po voidgeaie not bé patois. E è-n’se fât-pe râtaie d’allaie d’laivaint. Cment ci p’té d’lai Mairie que djâse aivô lai Julia. Èl y diaie : mon p’té drie mairtche dâ trâ mois ! Hé bïn, qu’i répond lai Julia, è dait étre en mé laivi ! Aivô ç’te pairaibôle dés ïnvitaies en ai nace, Djésus nos motre ïn visaidge de lai bontaie de Dûe, lu qu’nos ïnvite. È nos ïnvite en lai djoûe, lai djoûe tot content, é poquoi nian ? En lai djoûe d’lai mâsse : "Bïnèyerous cés qu’sont ïnvitès en lai tale di Segneu", c’qui vos veut dire aivaint lai comnion, ât nom de Djésus. E âchi, envèllie en lai djoûe éternelle. Le Royaume di cïe, cment le diais d’je le prophéte Isaïe qu’nos aint oûeyi tot content, dain lai premïere Yéjure, seré cment ïn recègnon de nace.  Qu’ât-ce qu’en veu répondre en ç’t’envèllie ? Crè-bïn cment cés dgens d’lai pairaibôle : "I n’ait-pe le temps !" ""I n’seu-pe prou bïn. È m’veulant r’luquait !" In po cment ç’te Djanne que s’trovaie trop grèche. Èl ât allaie dain ènne mâjon po pïedre di poids. Aiprès dou smaines, él èppelle son hanne ât téléphone é i dié : "Bondjoué Diu. I vait bïn. I é fonju d’moitïe ! Qu’ât-ce que t’en dit ?" E le Diu d’yi répondre : "Demoère-s-y encoè dou smaines !" E bïn, cés qu’n’aint-pe le temps, cés que n’se trovant-pe prou bés n’aint qu’è demouérait d’feû. Dâli, "ïnvitaie tos cés que vos troverait tchu lés tchemïns" dit le roi en sés vâlas. C’te pairaibôle bousse encoè pu gran l’envéllie : "lés vâlas raissembyèrent tos cés qu’è trovènnent, lés croûeyes cment lés bons". çoli faie è musaie tchu ènne âtre pairaibôle, vos sète : ç’té d’lai croûeye hierbe é di bon biè. Djunqu’en lai fïn di monde, è y veu avoit di bon é di croûeye tot mâçhait. Cment dain totes nos vies ! In po cment dain lai vie d’çi poûere Djoset qu’était moûe. Dain son pradge, le chire n’èrâte-pe d’dire di bïn : ah ! c’était ïn bon hanne, ïn vrai crèyaint, ïn pére tré bon aivo sés âfaints… Dâli, lai vave se vire vâ yûn d’sés âfaints é yi dié en l’araye : "vais voûere djunqu’en ci vâ é raivouéte ce ç’ât bïn ton pére qu’ât d’dain !" Ce nos vlant faire pètchie d’cés vâlas qu’vaint en lai croûejie dés tchemïns po dire é dgens : "venite-pie, le Bon Dûe vos aittend", è nos fât léchie d’ènne san dous tchoses : Lai premïere : è n’fât djemais botaie ènne étiquette tchu l’dos dés dgens : "croûeye". È peu lai doûejime : n’étre peu trop pressie. Le croûeye d’adjd’heû pouérait bïn devni le bon de dmain. Dûe échpére dïnche d’aivos tiétiun d’nos. Dâli, poquoi étre pu pressie qu’le Bon Dûe ? Se nos n’tchoéyant-pe dain cé dous tchoses, dâli nos poéyant répondre en l’envèllie de Dûe. Nos poéyant âchi botaie lai véture dés naces. Vos sètes lai çhouè en lai botnïere ! Qu’ât-ce que çoli veu dire : étre djeute aivo tot l’monde, dire lai voirtaie é étre bon aivo lés âtres. Voili lai bèlle véture de nace. E çoli nos rèppeule lai mâsse vou nos diant : « Bïnyèrous lés ïnvitaies ât recegnon di Segneu." Ât-ce que ç’ât bïn vrai qu’nos sont bïnyèrous de voûere lés âtres, d’étre aivos lés âtres ? De pètaidgie lai prayïre, le tieûsain é de bèyïe lai main d’lai paix ? Ou bïn ât-ce qu’en faie lés gros eûyes en cés qu’ne pensant-pe cment nos. Ïn po cment ç’tu qu’promnaie son tchïn è peu qu’rencontre ci Bian. È vais, qu’y dié l’Bian ? Eh ô. Qu’ât-ce que t’é faie en ton tchïn ? Poquoi ât-ce que t’y é copaie lai quoûe ? Eh bïn poéchque mè bèlle-mére vïnt tchie nos dûemoène que vïn. Dâli, le Diu y dié : ïn n’voa-pe ç’que çoli é è voûere aivo tai bèlle-mére ! É bïn chur que çoli é è voûre ! I n’voéro-pe qu’èl crèyeûche que quéqu’yun d’lai mâjon ât bïn aîje d’lai voûere airrivaie ! ç’n’ât-pe dïnche qu’en s’dairait r’cidre tiain qu’en vïn ât môtie. Que ç’te mâsse, seïngne de lai bontaie de Dûe, nos rédjôyeûche d’étre lés ïnvitaies ât recegnon dés naces de son Bouebe. Voili ènne bèlle câje de botaie lai véture de nace, ç’té qu’nos é bèyïe l’Bon Dûe ât djoué vou nos sont aivus baptayïes. È nos é dit : "Adjd’heû t’é devni ènne novèlle créâtion, t’é r’véti le Chricht, ç’te biantche véture que t’poètche en ât le sïngne. Que tés poirents, tés aimis t’édeûchïnt poi yos pairôles é yos exempyes è voidjaie lai dignitaie d’âfaint de Dûe po lai vie éternelle." Nos anchétres aint bïn voèdjaie yote crèyaince é è nos aint bèyïe ç’te voirtaie aivo ci bé pailaie quât not patois. È peu cés qu’aint fondaie lai Socïetaie dés patoisaints d’Aidjoûe é di çhiôs di Doubs aint aivus de boènnes musattes po le voadjaie. Nos lés poéyant bïn r’mèchiait adjd’heû é lés cheûdre tchu lés mainmes tchemïns sain rébyaie tot qu’è nos aint léchie. Nos n’dain-pe pïedre lai mémoûre cment ç’te daime de septante-cïntçhe ans qu’é t’aivu ïn p’tèt l’âfaint. É ô ! Vos sète mïntnaint aivo yos moyïns moderne de procréation artificiel, en peu, é ç’ât quasi ènne môde. Dâli, sés aimies sont vnis voûere ci ptèt. Aipré ènne houre de thé é de djâseries, è dmaindènne è voûere ci ptèt. Main, lai mére yos dmainde de patientaie en qu’ïn po é lés ïnvite è péssaie ât poiye vou é rècmencènne è djâsaie aivo di thé é dés toétchlats. Ènne houre pu taie, è n’en poéyant pu. È rdemaindènne en lai mére de voûere ci ptèt. Dâli, lai daime yos dit : "I vouérô bïn vos l’motraie, main i dait aittendre qu’è pûereûche, i n’sait pu vou i l’aie botaie !" Ah més boènnes dgens, lai mémoûere, ç’ât âtçhe ! En s’dè aidé rèplaie d’ât laivou en vïn é vou nos allant. Nos raicènnes et é lés fruts d’l’hèrbâ. Dïnche nos sont chûrs d’airrivaie en lai tâle dés naces, vou sont-d-je nos anchétres aivo le Chricht po lai vie qu’n’è-pe de fïn.   É bïn, que s’feûche dïnche !